[年齡無界限] 就係咁，我最近出席好多喪禮: １５７　閉目養神

係呢一條私家路上，我同小段並肩而行，跟住行係前面嘅珍妮段面，最後，珍妮無認到佢地嘅公母……唔係，應該係話佢呢一刻無勇氣面對佢嘅父母。

因為，佢自己都唔知要用咩野心情對住佢爸爸媽媽。

雖然而家珍妮係背住我同小段，但我地從佢微細抽搐緊嘅動作，而家輕微嘅哽咽聲，我地知道珍妮仲喊緊。

但係我地兩個更加知道而家嘅珍妮，要嘅唔係安慰，係大喊一場。

係呢一條私家路上，珍妮一直喊住咁行，佢喊嘅可能係因為自己無用，未準備好心情就走左黎呢一個地址。





試問一個自己一直想見嘅親人，仲要係當初唔要自己嘅親人，當知道佢嘅消息果一刻，一定會百感交集，如果……如果係我嘅話，我都可能會好似珍妮咁。

最後行完成條私家路，截左架的士一齊走，我坐前面，而小段同珍妮就坐後面。

係倒後鏡中，我見到喊累左嘅珍妮訓著左，個頭滑落到小段嘅肩上，而小段就用憐惜嘅眼神望住珍妮，我知佢好想幫珍妮，但係要點幫，而家呢一刻我地兩個都唔知。

「……媽媽……爸爸……」珍妮發開口夢，而小段就輕聲咁話：「珍妮，妳已經唔駛只係夢中見到你嘅父母拿。」

係，珍妮而家唔駛再係夢入面同佢父母相見。





眼角滑下一滴淚，珍妮訓左所以無擦走，然而，小段幫珍妮擦去。

「……唔好唔要我……」又係珍妮嘅夢話。

而小段聽到呢句話，更加珍而重之咁話：「放心，以後唔會有人唔要妳。」

唔知係未呢位的士司機識趣，總覺得今日架的士開得特別慢，而我當然都好識趣，無理後座嘅小段同珍妮，都開始閉目養神，因為呢排真係發生左好多事，我都要好好仔休息下。