[年齡無界限] 就係咁，我最近出席好多喪禮: １５５　我應唔應該叫……

跟住小段拎住嘅地址，搵左一段時間最後都係坐的士去，車程入面我不停咁諗唔知一陣見到珍妮搵返佢地嘅父母會係點？

但當架的士愈行得耐，發現途經嘅地方，開始發覺慢慢駛入左一個私家路邊，「阿伯，前面係私家路我唔知駛唔駛得入去，不如你係度落車行入去啦，行一陣就到架拿。」

我聽到的士大佬咁講後，都好識趣咁比左錢個司機大佬落左車。

望住條私家路，我第一時間只係諗到除左Ｄ有錢人，仲有邊Ｄ人會有私家路，然後再慢慢諗到，珍妮嘅父母……

向前行左一陣，經過好幾間大宅，慢慢見到小段同珍妮嘅身影，而小段發現到我，就即刻行左過黎，「……輝爺。」





「點啊，呢個地址係未珍妮父母所住嘅地方？」我望一望我地眼前嘅大宅，其實我都好奇呢個地方係未珍妮父母所住嘅地方。

然而，小段搖一搖頭：「唔知。」

「唔知！？你地一早黎到架拿ＷＯ。」我話。

而小段就答：「係，我地一早就到，但係珍妮拎住個地址，對左好幾次後，我問佢入唔入去，佢搖一搖頭後就再無講過任何說話，剩係企左係度望住間大宅。」

聽完佢咁講後，我望住呆滯中嘅珍妮，「佢一直最想搵到佢地嘅父母，點解到佢搵到呢個地址後唔入去搵佢地。」我講完呢句後，就同小段行到珍妮嘅身邊。





一行到珍妮身邊，佢就開口問我：「輝爺，天語呢？」佢呢個問題其實係毫無語氣可言。

「……放走左佢拿。」我答佢。

然後，珍妮靜左靜後話：「我想知道點解佢會有呢個地址。」

佢呢個問題，我答唔到佢。

「咁呢個地方係未……」我問，但我都未問完，珍妮就答：「係，就係呢度。」





頭先有少少遠，睇唔到珍妮嘅表情，但而家企係佢旁邊我原全感受到而家珍妮面上嘅表情所帶出嘅心情。

佢憧憬，但害怕，佢興奮，但帶有恨，佢傷心，但卻感恩。

「我好想見到佢地，但我應唔應該叫佢地做爸爸媽媽？」珍妮問我同小段，但我同佢，都唔識點答珍妮。