[年齡無界限] 就係咁，我最近出席好多喪禮: １５３　好事？定壞事？

天語佢見到我對佢嘅說話無咩反應，就話：「輝爺，你已經走過好多人生嘅路，亦都見識過好多野，應該知道呢個世界上面有白嘅地方就必地有黑嘅存在，但係世上仲有好多灰色地帶入面嘅人，不停為左平行呢個黑白世界而作出好多隱瞞。」

「妳意思係從商業角度出發，定人性上面出發？」我問天語。

「兩者都有，就好似有好多人都會講環保，但又有好多人都會話呢一個只係商家為左賺更多諗出黎嘅方法。又好似賣旗一樣，有好多人其實唔知賣旗果個機構係咩，但見到佢地拎住個錢袋應該係做善事，而且都係幾蚊，所以就當無左果回事，但到底有幾多人真係知道Ｄ錢嘅去向？而且有可能佢地知道後，就唔會再咁做。所以總有Ｄ真相係唔會比人知，係因為有班人覺得會影響左個世界運作一樣，不停控制做呢Ｄ真相。」天語話。

「但係妳所講呢兩個，會唔會太陰謀論？」我問。

天語只係笑而不語咁望住我，然後低下頭問我：「知唔知點解我個名叫天語？」





「點解？」我反問佢。

「我阿爸都係個記者，佢最想我以後可以為個天而說話，但係到最後佢竟然因為一件事而將一個真相收埋左好多年，而我，亦都晚晚明白知道真相係未一件好事，開始懷疑自己嘅初衷，入左呢一行更覺得自己嘅想法好天真。」天語好無奈咁抬起頭望住我話：「其實我都唔知我呢幾年做左Ｄ咩……」

本身我地諗住黎小段屋企睇條片，無諗過會無啦啦捉到天語，更無諗過事情會發展到咁樣，變左我一個人面對住天語呻，而小段就跟左珍妮去果個地址。

「其實，點解妳會整到而家咁嘅情況？」我將講離題嘅天語拉返正題。

「係一個真相就要浮面前，就係一場人命賭博嘅遊戲，我而家被牽涉其中，我唔想你地都牽涉在內。」天語話。





「所以妳就同珍妮講左佢阿爸阿媽嘅地址，令到佢只顧住搵返自己嘅父母？」我問。

而天語點一點頭話：「其實地址一早就搵到，只係我唔知珍妮係未真係想搵到佢地父母。」

「唔係佢係未真係想搵？」我好奇地問。

「輝爺，我諗你都知道珍妮將搵父母呢件事成日掛住口邊，但佢對佢父母係愛多Ｄ，定恨多Ｄ，你應該都好清楚。」天語呢一句，亦都係我成日會諗嘅一樣野。

而天語又問左一個問題：「你覺得，珍妮知道佢父母係邊，係未一個好事？」