[年齡無界限] 就係咁，我最近出席好多喪禮: １５２　與天語的對話

呢度係小段嘅屋企，但係而家入面嘅人卻係我同天語，頭先天語比珍妮搖到差唔多死咁滯，休息左陣之後先好少少。

「妳點解要咁做？」我問天語，但佢只係笑左笑無答我。

「點解要一個人攬晒上身？」我又問天語，佢又只係笑左笑。

「係未我點問妳，妳都唔會答我？」我再問，天語沉默不語。

咁嘅情況，我問咩野佢點都唔會講我知，如果係咁唯有轉另一個方法去尋找答案。





「天語，其實妳點解會做呢行？」無錯，我問左一個與事情無關嘅事，而天語聽到我咁問後，都呆左一呆咁望住我，然後就係大笑，再然後就係佢嘅反問：「輝爺，你唔係啊嘛，而家呢個時候問呢Ｄ野？」

我無理佢對我嘅譏笑，只係話：「問妳有開片嘅野妳都唔會問，咁橫店我同妳都好少機會得返兩個人，未當一個了解大家嘅機會。」

天語聽到我咁講後，不停點住頭話：「……了解。」然後佢吸左啖氣後話：「你知唔知道，當我未入行，係大學果陣讀傳播果陣，我係幾咁想入黎呢行架，因為我想將所有市民應該知道嘅真相都可以全部刊登晒出黎。」

佢講下講下，露出左一個好失望嘅眼神，「但原來，呢Ｄ都只係我天真嘅諗法，唔係因為知道真相永遠比人玩弄，而係知道左背後點解要有呢Ｄ潛規舉。」

「潛規與？」我好奇問，而天語就問我：「輝爺有無睇過一套係叫『ＭＡＮ　ＩＮ　ＴＨＥ　ＢＬＡＣＫ』？」





「有啊，講兩條友捉外星人嘛……」「唔係，佢地唔係捉外星人，而係唔比其他地球人知道外星人嘅存在，而又諗方法比外星人係地球生存。」天語未等我講完就更正我想講嘅野。

而我聽完佢講，詫異咁問佢：「妳唔會想講原來香港有好多外星人，妳係要保守呢個秘密所以唔比條片流出掛？」

我呢一問，換黎嘅係佢一下白眼，「你未痴線啦，緊係唔係啦。」

……咁妳又用外星人呢個話題形容，我以為同外星人有關都人之常情姐。

然後佢又話：「其實有好多真相講出黎，係未真係對香港好？有Ｄ佢地係未又接受到？雖然我好明白傳媒透明度對市民好重要，但有時有Ｄ野如果市民知道會做成恐慌，咁係未變相左加速惡化？」





一大堆咁難答嘅問題又天語把口講左出黎，我都唔知點應佢好。