[年齡無界限] 就係咁，我最近出席好多喪禮: １５０　與天語對峙

係小段屋企，我地三個望住眼前嘅天語。

「點解會咁？」小段問。

「答我地啊！」珍妮問。

「等等……你地唔駛咁瀲動。」我控制緊佢地嘅情緒。

「輝爺啊！你睇下佢！佢跟人竟然無著乾濕褸同戴帽啊！！！」珍妮話。





「未係囉！咁重要嘅衣著都無！」小段和應。

無錯……由頭先入屋到而家，佢地兩個為左衣著嘅問題已經嘈左十五分鐘，而天語只係冷笑左一下後答佢地：「你地呢Ｄ門外漢真係以為咁著，然後跟住人後面就無人見到你，太天真拿。」

其實天語講嘅說話我好認同，但係當你知道而家佢一身嘅衣著，就覺得呢句話出自佢個口好無說服力，因為佢著到成個福爾摩斯一樣。

「妳咁著Ｄ人未仲知道妳係邊！」珍妮反駁，但係天語只係冷笑左一聲，然後將目光投向我，而小段同珍妮都一樣望左過黎我度。

「……望住我做咩啊？我咩都無講過。」我話，但天語就開聲講：「我先前咁著跟住輝爺，佢都察覺唔到啦。」





……竟然有Ｄ咁嘅事……

我無言地睇住佢地三個再為左衣著呢個問題嘈左十五分鐘後，先進入我地最想問嘅野。

「點解要跟住我地，唔堂堂正正咁搵我地？」我問。

天語好似有難言之忍話：「我唔想令到你地都涉及果件事。」

「邊件事？」我又問，而小段就直接話：「係未同條片入面果個有錢人有關？」





睇黎小段講中左，因為小段嘅說話一講出黎，更語個表情有少少變左，「你地真係唔好理，好唔好？」

而珍妮呢個時候就話：「如果我地唔知我地就可以唔理，但如果我地知我地就要理。」

其實聽完佢呢句咁無營養嘅話，我都唔知點應佢好，而天語眼定定望住珍妮，然後話：「如果，我話妳知妳父母嘅地址，妳係未會放棄唔再查落去？」