[年齡無界限] 就係咁，我最近出席好多喪禮: １３８　朋友

阿里媽媽走左都已經過左一個月，阿里佢地亦都因為證據確鑿被判罪，不過阿里因為有人求情，所以罰得輕Ｄ。

細路祥已經將阿里媽媽嘅保險金交比阿里嘅家人，而佢感激之餘，亦都悲喜交集，但呢個已經係另一個故事。

係判罪果日，我地幾個人都比銅ＳＩＲ叫左過去，不明所以嘅我地聽到銅ＳＩＲ嘅說話，都呆一呆。

「比你地同阿里傾幾句。」簡單直接嘅說話後，珍妮問：「咁樣唔係犯法嘅咩？」

銅ＳＩＲ只係笑左一笑後話：「我不嬲做野都咁踩界，如果唔係咁，邊會做到野。」呢一句話真係好意味深長。





係一間安排好嘅房內，阿里坐左係一張椅上面，戴上手扣，神情好輕鬆，好似已經知道自己之後嘅事一樣，就算真係坐監佢都唔在意。

「你點啊？」細路祥一見到阿里就問。

「幾好啊我。」你真係好難相信一個就要被定罪嘅人會講出呢句說話。

「保險果邊已經幫你處理好，Ｄ錢都已經交左比你嘅家人。」細路祥講完後，阿里就充心多謝細路祥，然後又話：「我都收到消息，叫我地做野果個人都比返Ｄ錢我家人。」佢講呢句說話時，我留意到佢望左銅ＳＩＲ一眼。

現場靜左一陣，「有無野我地可以幫到你？」我問阿里，而阿里就答我：「你咁問到，我又真係有野想拜托你，你住得我咁近，可唔可以得閒幫我睇一睇我屋企嘅情況，然後話比我知啊？」





我諗左諗後答佢：「可以，咁你記住你係探監ＬＩＳＴ上面寫我個名。」

大家聽到後笑左出黎。

而珍妮係呢個時候，問左一個問題：「阿里，你有無後悔過做左呢Ｄ野？」

阿里只係笑左一下話：「我無得揀，如果有得揀，我都希望唔做，但係，我無怪過任何人，亦都無怪過呢個社會，因為永遠唔可以叫環境遷就人，永遠都係人融入環境，我只可以話，香港呢一刻仲未完全接受我地呢班人，但我地會去試，一開始可能會走錯路，但當有一日，錯夠後，路點都會走回正途，我希望我地下一代可以開心見誠咁話，我地都係香港嘅一份子，所有人都唔會再戴有色眼鏡黎睇我地。」

如果，時間能夠磨滅分岐，咁唔知係我有生之年，我同我子女嘅分岐可唔可以磨滅到？





「將軍無棋啊！！！」呢一句唔鹹唔淡嘅賡東話帶我返黎現實，「輝爺你呢排成日捉棋發白日夢啊。」我面前個對手好開心咁收緊Ｄ棋。

而我，笑左一下後話：「讓你咋，我今次讓你雙炮雙馬我先輸咋。」

我對住面前，教左佢捉左兩個星期棋嘅阿里爺爺話。

我同呢個南亞裔人，做左朋友。