[年齡無界限] 就係咁，我最近出席好多喪禮: １３９　緣份

「如果，一個真相被令一個真相遮住，呢個算唔算係一個大話？」我真係唔知由幾時開始，阿然嘅夜冷店會成為我地嘅大本營。

我口中嘅我地，包括有我、阿然、細路祥、小段、珍妮……仲有一個我到而家都唔知點解佢會無啦啦埋堆嘅人，天語。

而頭先呢個問題，係佢飲醉左酒後講出黎，除左佢飲醉左，仲有珍妮，「妳呢一個問題，真係一個問題黎。」

原來珍妮飲醉左之後，會不停講好多廢話。

其實係我人生當中，都見識過好多酒量好好嘅女人，但好肯定我眼前呢兩位一定好唔飲得，而且酒品都麻麻地。





天語將佢拎黎嘅報紙卷做一條棍狀，不停敲打坐佢旁邊嘅細路祥個頭，一邊話：「你知唔知啊，報紙上面寫嘅野，你地唔會知道有幾成真！幾成假架！」

我地無奈咁望住細路祥遭殃，唔係我地唔阻止，而係因為有次我地阻止天語，後果變得仲慘，經過幾次後，我地學識左一樣野。

「係囉……係囉……」只要不停咁答天語同珍妮，佢地兩個就會好安定咁坐係度講野，直到講到佢地訓著。

今次，佢地講左三個幾鐘先訓。

「終於耳根清靜。」阿然話，而我地幾個笑左笑，小段就話：「每個人都有佢地嘅壓力嘅，可能，佢地兩個我地幾個入面最多。」





聽到小段嘅說話後，我就講笑話：「你講到你而家無咩野煩咁ＷＯ，係未呢排死得人多，你好多生意接啊。」

小段笑到烚熟狗頭話：「ＯＫ啦，最近細路祥彈左好多生意比我啊，而我又彈返Ｄ生意比佢，真係估唔到保險加殯儀可以咁夾。」

細路祥聽到小段咁講後，都笑左出黎，而我同阿然則係無奈咁對望，我話：「阿然，你最後睇住你個仔，唔好比佢誤入岐途。」

阿然回話：「我諗已經太遲。」

我真係無諗過，緣份會令我地呢一班無關連嘅人聚埋一齊，但係，亦都無諗過緣份，會令我地呢班人一個一個分離。





「……爸爸……媽媽……」每次珍妮飲醉左，口中都會不停講呢幾個字，而坐係佢旁邊嘅小段，每次都會用一種憐惜嘅表情望住佢。

「追到珍妮未啊你？」阿然好直接咁問，小段尷尬咁笑住話：「……然伯，你講咩啊？」

「未扮野啦，我同阿輝做左咁耐人，一早睇得出你對珍妮有意思啦。」阿然話。

只見小段微笑左一下後話：「我上次同輝爺都有講過，珍妮，佢好似一個對愛無憧憬嘅人，佢長期關住對門唔比人入去，我都無法架。」

「可能，佢嘅心結，係來自佢父母呢。」細路祥話，佢呢個說法，我地現場所有人都知道，只係唔知道可以點做。

突然，本身訓緊嘅天語無啦啦紮醒左，我地幾個嚇左一跳，睇得出佢仍然係醉緊，而佢就用朦矓嘅眼神望住我地幾個，再係佢個袋入面拎左張紙出黎，「……地址……珍妮最想知道嘅地址……」然後，又訓左。

清醒嘅我地望住天語拎出黎嘅地址，不明所以互望。

「……爸爸……媽媽……」





地址放左係珍妮嘅旁邊，佢訓著嘅吐吶將紙吹動，就好似講緊，呢個地址，對珍妮好重要。