[年齡無界限] 就係咁，我最近出席好多喪禮: １３６　人情

在落係跑馬地嘅墳場內，葬禮儀式都差唔多，到左要下葬嘅果一刻。

聽小段個朋友講，呢個墳場內有好多唔同國家、宗教嘅人都莽係度，回教墳場、天主教墳場、香港墳場、巴斯墳場、印度人墳場，再走入跑馬地區還仲有一座猶太人墳場。

雖然香港彈丸之地，住嘅地方都唔夠，但死後，都希望可以有個下葬之地。

就同先前所講嘅一樣，伊斯蘭教係要速葬。

唔用棺木，放嘅次序通常係腳先，身體安放係墓嘅右邊，死者頭部需面向麥加，係伊斯蘭教第一大聖城，遺體必須接觸泥土以符合人死後應該盡快回歸泥土嘅伊斯蘭信仰。





墳墓大小約為６尺深６尺長４尺闊，墓內唔可以擺放任何物品及陪葬品，但可以撒香料驅走蛇蟲。

遺體安放好之後，參加葬禮者便會祈求真主饒恕死者。

呢個，就係佢地嘅下葬儀式。

我地望住阿里口中默念，表情悲傷，望到此情此境，我諗起頭先小段朋友同我講過嘅四個字。

厚養薄葬。





再回想返自己，其實，我有無真係厚養過自己嘅父母，而我自己嘅子女又有無厚養過我？其實有，一個唔係我親生嘅女，阿芳其實對我好孝順，但係自己個親生仔就……

薄葬，其實我死後，我都唔會知道我係薄葬定風光大葬。

下葬儀式完畢，曲終人散，比係我地中式嘅喪禮，佢地真係快得多，亦都唔駛咁快。

阿里向黎到嘅親友一一致謝後，就走到我地面前，「你地都黎左，真係有心。」然後佢再同小段講：「多謝你介紹朋友幫我。」

小段點一點頭講左句：「節哀。」





如此一來，阿里最想做嘅野已經完成，而銅ＳＩＲ就係呢個時間出現。

我地望一望銅ＳＩＲ，再望一望阿里，睇得出阿里好似一早已經知道一樣。

「銅ＳＩＲ，阿里真係好人黎架，你可唔可以幫下佢？」細路祥仍然唔放過任何一個可以幫阿里求情嘅機會。

但係，阿里阻止左佢，「銅ＳＩＲ已經幫左我好多。」佢行到銅ＳＩＲ面前，伸出雙手同佢講：「拉我。」

銅ＳＩＲ只係笑而不語，然後拎出孖葉鎖起左阿里。

「舅父，真係要咁做？」小段問，但銅ＳＩＲ無答，而答佢果個係阿里：「如果唔係銅ＳＩＲ，我都出唔到答送我阿媽最後一程。」

原來阿里走甩果日，係銅ＳＩＲ特登放佢走。

「你做錯野，法律會判你罪，但人情呢樣野，法律係做唔到，只有人先做到。」銅ＳＩＲ講完呢句後，就帶走左阿里，而我地就跟住佢地後面，送走佢地。