[年齡無界限] 就係咁，我最近出席好多喪禮: １３５　阿里媽媽的喪禮

兩日後，阿里媽媽嘅喪禮上，今次我地無去到殯儀館，而係去左一間類似回教教堂嘅地方，唔好問我點解話類似，因為我以前都未去過。

仲記我兩日前，係阿然嘅夜冷店度，阿里求助於細路祥，「我呢兩日唔可以出面幫阿媽打理身後事，你可唔可以幫我手？」

細路祥聽到阿里嘅求助，雖然想幫手，但力不從心，「保險我就幫到，但係呢一方面就……」

眼見欲言又止嘅細路祥，小段就企出黎話：「放心，我識朋友可以幫你。」

阿里從心咁多謝小段。





今次呢個喪禮，小段話佢無能為力，因為阿里係伊斯蘭教，要用穆斯林式嘅葬禮，佢自己唔識，但係佢呢一行總會有人識。

而今次幫手嘅，亦都係一個南亞人，一個係香港土生土長嘅南亞人。

我地幾個出席呢個喪禮，同平時果Ｄ好唔同，佢地喪禮無祭品、無雕像、無相片，而同樣有嘅就係親人、朋友、以及旁邊念緊古蘭經嘅人。

「我地駛唔駛上前鞠躬架？」珍妮壓低聲線問，而小段就答佢：「唔駛，伊斯蘭教嘅葬禮唔可以跪拜，因為佢地覺得只有神先可以跪拜。」

我地係旁邊搵左個位企，見到所有黎嘅人都係著長褲，女嘅有Ｄ就著長裙，但係就一定著住長袖衫。





以我而家發現，阿里都係度，佢係旁邊不停咁念緊Ｄ野，但太遠我地聽唔清楚。

而呢一刻，一個南亞人行左過黎，同小段打左個招呼，睇黎呢個人就係小段搵黎幫阿里手嘅人。

「辛苦你。」小段向果個人話。

「唔會，幫自己人，點會辛苦。」果個人話。

珍妮一知道呢個人係幫手搞呢次喪禮嘅人，就問左好多問題……





「唔駛棺材架？用幾塊布就得？」「點解咁快可以搞到嘅？」「點解無相嘅？」「駛唔駛比帛金架？」「點解……」

但面對珍妮呢Ｄ問題，呢個人都一一解答。

「伊斯蘭教嘅喪禮會以速葬方式，因為係先知穆罕默德講過，『早晨死了，不可停放過午，黃昏死了，不可過夜。』，而且一定要土葬，唔會用棺木，只會直接下土歸真，香港政府都好好，好尊重每個族裔嘅習俗，因為其實當有人死，都要搞死亡登記等等嘅程序，但如果知道係伊斯蘭教，就會優先處理，或者去警署申請遷移及埋葬遺體許可證。」

「伊斯蘭教主張厚養薄葬，意思係生前要盡孝，死後就簡簡單單，因為唔好以大費周張，所以無祭品、無雕像、無相片，更加唔駛比帛金，無論你係有錢人定窮人，死後都只會有果一小處地方下莽，唔會有例外。」

「下莽前，親人都會為先人清洗遺體，男幫男，女幫女，當然如果係夫妻關係就唔駛受限制，而且有傷口嘅人唔可以幫手洗遺體，亦都唔可以為死者剪指甲同剃鬚，然後家人會為死者穿上乾淨嘅「卡番」，即係用來包裹先人嘅白布，男會用三塊白布，女會用五塊白布包裹遺體，而中式會幫先人化妝，但係伊斯蘭教係唔比幫死人化妝。」

呢位人兄實在講解得好詳盡，令我差Ｄ不禁想為佢鼓掌，但當我醒覺身處係喪禮現在，我就停止呢個諗法。

而小段就話：「你唔駛理呢個八妹，當佢問嘅野無到就得。」

「咁又唔係，如果有人想知道我地呢一類人嘅野，我真係無任歡迎，我地都希望係我地融入香港嘅時候，都可以比你地認識我地呢一班人。」無錯，呢一班人其實係香港都紮根左咁耐，但點解我地仍然隔漠。