[年齡無界限] 就係咁，我最近出席好多喪禮: １３４　做你最後想做嘅事

離開報館前，果位老總同我地講：「你地放心去搵阿里，我唔會再派人去跟呢條線，因為呢單野已經無商業價值。」

聽到佢呢一句，唔知好嬲定好笑。

細路祥約左阿里阿然間夜冷店度等，我地用左半個鐘就去到阿然間店，但係一去到，卻見到銅ＳＩＲ一早企左係店前。

銅ＳＩＲ望一望小段，而小段就好尷尬縮左係我地身後，珍妮就問：「點解你會係度架？」

銅ＳＩＲ只係笑左笑，然後話：「我做左咁多年差人，唔多唔少都有Ｄ本事，不過你地放心，我今日只係一個人黎，無帶我班伙計。」





由呢一句我聽得出，銅ＳＩＲ係有心咁做，因為如果佢真係要捉阿里，佢真係會帶晒成班差人黎做野。

但係，佢無咁做。

佢走去我面前，然後話：「我知道阿里佢救左你，但係香港係有法治，我只可以幫佢完成佢最後想做嘅事。」佢講完呢句後，拍一拍我個膀頭，「同阿里講，我會係佢最想出現嘅地方等佢，等佢做完佢想做嘅野，我就會帶佢返去。」

銅ＳＩＲ講完呢一句後就走左，而聽到呢一句嘅其他人就問：「佢口中所講嘅果個地方，係邊度？」

而小段就答：「應該係佢阿里媽媽嘅喪禮，而佢地嘅習裕，通常有人離開，果個人要盡快處理，最好係一日之內，不過香港點都要有Ｄ程序，所以，應該呢幾日，阿里會出現係佢媽媽嘅喪禮上面。」





我地走入阿然嘅夜冷店，阿然見我地咁多人就問：「咩事今晚咁齊人？」

我大嘅講左呢一排發生嘅事後，阿然都大嘅有個明白，然後就話：「你個死老野臨老都可以搞咁多事出黎，真係呢……」

佢呢句當然係講笑啦，不過其實我自己都有咁諗過……

等左陣，阿里出現，佢係夜冷店前左顧右盼左一下後入左黎，見到我地咁多個人，都好似阿然咁嚇一跳後話：「咁齊人嘅。」

嗤笑左一句後，我同阿里講：「節哀順便。」





而阿里對我點一點頭。

我同阿里交集較少，而且好幾次都係出事中嘅交流，但係我漸漸發覺其實佢都係身不由己。

「伯母嘅野ＯＫ嘛？」細路祥問，而阿里拎左份保險出黎，「我屋企人處理緊，但係要用Ｄ錢。」佢將份保單拎比細路祥，然後佢有少少燥話：「估唔到果條友話幫佢做完野會有錢收，但最後佢話我地做唔到佢想要嘅結果，一Ｄ錢都唔比我地，細路祥，我而家只有保單呢Ｄ錢先可以幫我媽媽……」講講下，阿里好激動咁喊左出黎。

然而，細路祥就拍一拍佢膀頭話：「放心，一定無問題。」