[年齡無界限] 就係咁，我最近出席好多喪禮: １２２　阿里係好人？

當珍妮問出左呢條問題後，我屏息以待等阿里嘅答案，而阿里佢先係好認真望住我地話：「個結果對你地好重要？」

「當然。」珍妮話，佢比我更快講出我自己所想。

然後，阿里笑左笑，係一個尷尬嘅笑容，「我打開左份報告，但係份報告全部都係英文，我一個字都睇唔明，所以我唔會知道份報告嘅結果。」

聽完，無言……

但我就好似如釋重負，一個人突然間放鬆，真係會腳軟，我跌坐左係地上面，珍妮即刻行過黎話：「輝爺你無野嘛。」





我向佢搖一搖頭，然後佢就扶起左我。

「阿里，可唔可以唔好比人知道裡面嘅野？」我問佢，好誠心咁問。

而阿里就答我：「我只可以確保係呢一度，無人可以睇呢份報告，不過，我地點都會將份報告交比人，到時我就確保唔到。」

「都好……我只係唔想第一個知道結果嘅人係一個唔關事嘅人。」我答佢。

阿里點一點頭後就行左出去，然後，又剩返我同珍妮。





「輝爺，咁而家點算？」佢問我。

「我都唔知。」我答，咁而家呢個環境，我呢個老人家真係咩都做唔到。

時間一直咁過，到第二次訓醒嘅時候，已經係另一個境像。

我只係記得，第二次訓醒張開眼，我眼前果個人係小段、細路祥、珍妮仲有天語，係佢地身邊嘅係一大班差人，當中，仲有銅ＳＩＲ。

「你地……」我內心嘅疑問都問出口，小段就話：「我一通知唔到你地就去搵舅父幫手，好差人天眼影到你地係邊，所以先搵到黎呢度。」





我望一望四圍，然後諗起，「份報告！？」

只見珍妮同小段都搖一搖頭，我諗佢地搵唔到份報告，而細路祥就係呢個時候行到我面前話：「佢地已經將件事話左我知，我想講，阿里佢係我其中一個保險客人，係一個好人。」