[年齡無界限] 就係咁，我最近出席好多喪禮: １２３　問話

因為驚動左警方，所以為左協助調查，一切有關人士都要幫手，天語一知道咁成個表情就好似面對火山爆發一樣。

「點解妳咁嘅表情？」問得出咁直接嘅問題，一定係珍妮。

天語苦笑左一下後話：「我地記者最怕面對嘅就係差人，因為我地有好多本來唔可以比人知嘅情報，都會比差人狂問，問到我地肯答為止。」

珍妮消化左天語嘅答案後話：「但妳堅持唔講都得架。」

「……咁……咁又係。」天語話。





天語因為知道比較多，所以銅ＳＩＲ叫左其他伙計帶佢返去差館問話。

而銅ＳＩＲ知道我住係阿里附近，所以帶左幾個差人同我一齊返去，而當中仲有細路祥、小段同珍妮。

返到去，我地先係去阿里嘅屋企，成大班差人上黎，點都會驚動Ｄ鄰居，好幾戶都有人裝出黎睇下發生咩事。

而我地係阿里個單位前面企左一陣，就有一個婦人出左黎開門，然後用一Ｄ我地唔識聽嘅語言講左一大堆野。

好彩銅ＳＩＲ其中一個伙計可以同佢溝通到，唔係真係雞同鴨講。





最後溝通左一陣，婦人都比我地入去，而我地行入去果陣，婦人好似識得細路祥，向佢微笑咁講左Ｄ野。

「你地識嘅？」銅ＳＩＲ問。

而細路祥點一點頭話：「佢係我保險客。」

坐低，同佢溝通到嘅差人繼續問佢野，雖然我聽唔明，但我估都係問一Ｄ關於阿里嘅事。

而珍妮就係旁邊，問細路祥野，「你同先話阿里媽媽係你個客？」





「係啊。」細路祥點一點頭：「佢買左份人壽，而先前阿里約我出黎傾個份保單。」

「係未去果間餐廳傾？」小段問，佢所指果間餐廳就係果日我地成班人跟蹤阿里，然後見到細路祥出現果間餐廳。

「你地點會知？」細路祥問，但我地無答佢，只係對望左一下後話：「不來果日佢地傾緊保險嘅野……」

而細路祥就話：「阿里媽媽有絕症，時日無多，所以阿里黎問我保險嘅事。」佢嘆一嘆氣後又話：「阿里佢好孝順架，佢想盡方法去搵錢返黎醫佢阿媽嘅病，無底線咁做所有野，但到最後都係醫唔好佢阿媽個病。」

我地聽到後都望住阿里媽媽，睇得出佢身形瘦弱，唔多精神，睇黎細路祥佢無講大話。