[年齡無界限] 就係咁，我最近出席好多喪禮: １２１　合群？

食完盒飯，阿里望住我地微笑話：「食飽嘅感覺係未好好呢？」

聽到呢句話嘅我問：「你問得出呢一種問題，姐係代表係試過捱餓。」

「細個果陣成日都捱餓。」阿里答我，而佢呢一下笑容，好似話而家捱慣，一笑置之。

珍妮都食完，然後佢就問阿里：「你頭先講你比人監視，又咩野合群，其實係咩野事？」

阿里仍然微笑，但係果種微笑係帶有無奈，「你地本地嘅人，可能唔會知道我地呢Ｄ外籍人士嘅苦況。」





佢一邊講，一邊幫我地收起食完嘅飯盒，「我地阿爸阿媽係外籍人士，南亞人，當初因為黎香港做野可以搵到錢比家鄉嘅人生活好Ｄ，所以佢地都黎左香港，然後佢地係呢度識，係度結婚，然後仲生左我同我細妹。」

「雖然阿爸阿媽做嘅工作都係一Ｄ低下層工作，但係對鄉下嘅人黎講，已經係可以提高生活質數，所以就算佢地點辛苦都好，都會捱落去，但係果份人工對鄉下可能好多，但係我地係香港生活，又多得去邊，我又係最大果個，所以就算捱餓，都想我細佬妹食飽。」

「我地呢一班人一直都好想融入香港生活，但係岐視成為我地最大嘅牆，我地唔係無識過，但係總會有閒高閒語，我地唔係唔想做Ｄ好嘅工作，唔係想到處惹事生非，而係我地唔咁樣做，我地保護唔到自己嘅野，可能好多人都覺得我地係外來人，但係，就好似我頭先所講，我身份證係三粒星，我係土生土長，我都係講廣東話，講同一樣嘅語言，但點解要將我地分類成對社會無貢獻嘅人？」

阿里講到呢到，就望住我地兩個話：「就係因為咁，我有好多朋友一開始本身帶有希望，覺得假以時日，香港都會接受我地呢一班人，但係一直以黎嘅打壓，令到我地對呢一個希望幻滅，有Ｄ人等唔到，就唯有一齊做返自己覺得岩嘅野好保衛自己嘅領土，要所有人知道，我地嘅存在，就係咁，好多朋友都慢慢將希望變成仇恨，我睇住身邊一個又一個朋友變成咁，我最後，都只可以選擇合群。」

「但你可以唔合群架。」珍妮話。





而阿里就望住佢講：「我都想，但係我無得揀，如果我唔合群，就會連唯一嘅家都無，就要放棄一直陪住我嘅人，而且……」佢講到呢度，就無再講落去。

「而且Ｄ咩？」珍妮問，但我拍一拍珍妮，叫佢唔好再問，因為我見到阿里嘅表情已經唔多想再講落去。

珍妮無左問呢條問題，但佢問左其他野，「咁點解你會話比人監視？」

阿里深呼吸一啖後話：「如果我唔做一Ｄ同佢地一樣嘅野，佢地就會覺得我係唔合群，所以我只可以跟住佢地做，而且，比錢我地嘅人派左人監視我地，如果我唔做出佢想要嘅野，佢就唔會比錢我，我而家真係好需要用錢……」佢講都呢度又停左。

「點解……」珍妮想繼續問落去，但我又拍一拍叫佢唔好再追問。





跟住，大家都靜左幾秒，阿里見到氣氛又Ｄ唔好，就打圓場話：「我幫你地處理食剩嘅野，我會襯佢地睇唔到嘅時候，拎飯比你地。」

我地兩個對佢點左下頭，「多謝。」我話。

而珍妮就係呢個時候，又問多左樣野，而佢呢次問嘅野，亦都係我最想知嘅野，「你話你睇左輝爺份報告，咁可唔可以話比我地知份報告嘅內容係Ｄ咩？」