[年齡無界限] 就係咁，我最近出席好多喪禮: １１９　阿里

……個頭……好痛……

「輝爺……你醒醒啦……」點解我聽到珍妮嘅叫聲嘅？

我慢慢張開眼，而家嘅我係一個房入面，雙手比人綁住左仲要放左係背後……「輝爺你醒左拿？」

珍妮把聲係我後面傳過黎，本來我想轉身望向後面，但係又聽到珍妮話：「你醒左就唔好亂郁啦，我係你身後面啊，佢地將我地綁埋一齊。」

呢個時候，我先清醒晒問佢：「綁住左？」





「係啊，頭先我地係後巷嘅一道門前面，然後有個人一打開門就打暈左我地，我一開眼就見到我地比佢地捉左仲綁左係度。」珍妮話。

我記起，我地本來係跟緊個南亞青年，因為我地懷疑佢收左人錢要搶我份報告嘅人。

「死啦，我地係度咩都做唔到，佢地又收左我地電話，搵唔到小段佢地黎救我地。」珍妮話：「唔通我未搵到我父母就要死係度……」

「未講笑啦，點會啊。」我回應珍妮，然後問佢：「我地係度幾耐拿？」

「唔知啊，又無得睇時間我點答你，不過我就覺得過左好耐。」珍妮好直接地答左我一段廢話。





今次都唔知點算好，不過知道我地比人捉左果一刻起，我個心有少少覺得對唔住珍妮，因為本身呢件事唔關佢事，一切都係因為我份報告而起……

「如果……如果我一早睇份報告，又或者將份報告比小桃紅，就唔會發生而家嘅事。」我話，我用後悔語氣話。

而珍妮聽到後，只係笑左一聲，「算啦輝爺，呢個世界係唔會有如果架。」

又係呢一句話，呢個世界係無如果。

就係呢個時候，有個人開左呢間困住我地嘅房嘅門，走入黎嘅人，係南亞青年，佢企左我同珍妮面前，笑左笑後話：「你條老爺，益左你啦被人困住都仲有條女陪你。」





「你講咩野啊！你做咩捉我啊！你想對我地點樣啊！係未你搶左輝爺份報告啊！你到底想……」因為珍妮不停嘅嘈吵，個南亞青年忍唔住用牛皮膠紙封住左珍妮把口。

「咁撚嘈嘅女人真係第一次見。」南亞青年話，然後就走到我面前望住我，「記唔記得我講過，我唔會就咁算。」佢笑得好心懷不軌。

我望住佢，再問果條我先前問過佢果條問題：「份報告係未真係你搶左？」

南亞青年好認真咁望住我答：「係。」

然後我又再問佢：「點解你要咁做？」

佢笑左笑答：「受人錢財，替人消災。」

「係邊個指使你？」我問。

佢無答我，只係企左起身走向門果邊，而我係就走到門果陣又問多次，而佢今次答：「我係唔會話你知係邊個指使我，不過我可以話比你知，係我阿里搶走，等你得個明白。」





「阿里……」我默念呢個名，「好多南亞人都叫阿里架ＷＯ……」

佢笑左笑，「係啊，不過其實我叫咩名你都唔會在意架啦，我諗你最在意嘅，係以下呢件事。」阿里邊關門邊話：「我打開份報告睇過。」

門關上，珍妮係我身後吱唔咁叫，而我聽到阿里所講嘅說話成個人呆左，因為第一個人知道報告嘅結果，竟然係一個與報告毫無關係嘅人。