[年齡無界限] 就係咁，我最近出席好多喪禮: １１８　深入虎穴

南亞青年同細路祥傾完野後，就走出呢間餐廳，我地當然跟住佢地尾啦，但去到一個街口，佢地兩個道別後就分開左行。

「咁而家跟邊個好啊？」珍妮問。

而天語好快諗左陣後，就話：「小段同我去跟細路祥，珍妮就同輝爺去跟個南亞青年。」

其實我對天語作出呢個決定有少少想法，想知點解佢要咁樣分組，不過當我想問佢嘅時候，珍妮已經搶先答：「好，咁輝爺我地行。」

佢一手拉住我行，我想問都問唔到。





分開左跟後，我同珍妮小心地跟住南亞青年後面，「唔知頭先佢地傾果Ｄ錢係未同你份報告有關呢？」珍妮問。

其實佢呢個問題我都想知道，但係無謂去估其實只會增加煩惱，倒不如跟到底快Ｄ搵到個答案。

跟住個南亞人去到一個後巷前，個南亞人企係度望左一望四周先行入個後巷。

「咁鬼鼠實有問題。」珍妮話。

條後巷好黑，只有幾支燈照住，珍妮本來想跟埋入去，但係我阻止左，阻止理由係因為如果我地跟入去後巷，當個南亞青年一轉頭望向後，實發現我地跟住佢。





所以我同佢只係企係後巷前面探頭望入去。

我地望住南亞青年嘅身影，正到佢去到一道鐵門前，佢有規律咁敲道門，過左一陣，有另一個南亞人開門比佢，佢就咁入左去。

「佢入左去啊。」珍妮話，然後一支箭咁衝向道門前，我捉到捉唔住佢。

走到門前面，珍妮查左一查道門後話：「死啦，跟到呢甩左未前功盡廢？」

我企係佢身後面，望一望四圍，燈光真係有Ｄ暗，但係都唔會暗到咩都睇唔到，然後我發現係我同珍妮正上方，有一部機……





係一部閉路電視……

一見到呢部野，我就心知不妙，我拍一拍珍妮，指一指上面，而佢就慢慢望向上，「果部係……」

佢都未講完佢要講嘅野，門就打開左，一個好大隻好高嘅南亞人望住我地，係一種不善嘅目光……