[年齡無界限] 就係咁，我最近出席好多喪禮: １１６　點解佢會係度？

大家唔好話我長氣，我而家真係不停諗緊我究竟做錯左Ｄ咩，臨老仲要經歷呢Ｄ野……我望住眼前嘅呢個組合……

做殯儀有時好貪錢嘅小段。

講野好直接成個腦都掛住尋親嘅珍妮。

仲係好似有好多野瞞住我地嘅天語。

以及……呢件事件其中一個主人翁嘅我。





兩男兩女，三個後生一個老，匿左係一條好臭嘅後巷。

「……妳收Ｄ風岩唔岩架？」小段壓低聲線問。

「放心啦，你唔記得左我做邊行架，Ｄ料一定準。」天語自信地回答。

「咁如果一陣我地見到個南亞青年要點做？衝出去捉住佢啊？」珍妮天真地問。

「緊係唔係啦，繼續跟，跟到佢拎出果份報告為止。」天語答。





見到佢地三個為左我份報告咁落力，我真係好感動，「我好多謝你地為左我做左咁多野。」

我講完呢句後，天語無理到我，而小段就好尷尬咁笑左笑，只有珍妮，佢好直接回答我：「唔駛多謝，都係天語話如果我黎幫手，可以比我免費登一個月尋親廣告。」

……原來係有利益關係，呢個時候我將目光望向仲有少少尷尬嘅小段，而佢就自己講左出口：「天語話如果幫佢手，佢會介紹好多客比我……」

你個死仔都估你無咁好死會幫我……等等，天語話介紹好多客比你，佢身邊有無咁多人死啊……

等珍妮同小段講完後，天語又再答我：「我係為左自己份工，所以都唔算幫你。」





唉，呢個世界真係炎涼。

就係我慨嘆嘅時候，果位南亞青年終於出現，佢一行出黎先左顧右盼左一下，然後就離開左，我地小心咁避開佢嘅視線，然後跟住佢身後。

「你估佢而家去邊？」珍妮問。

「我點會知啊，知我地就唔駛跟啦。」小段答。

「我問下姐，唔得咩？」珍妮鬥氣地回答。

「喂，你地兩個唔好咁大聲嘈啦，一陣比佢發現我地就死拿。」天語話。

而我望住佢地三個，真係一粒聲都唔想出。

突然，南亞青年停左係度，向後望左一下。





「死火，佢係未發現左我地？」珍妮問。

「一定係妳講野大聲啦。」小段話。

「唔好嘈啦，我裝出去睇睇。」天語話。

係南亞青年望向後面果一下，我地條件反射地匿左係一個報紙檔旁邊，更語探頭出去望左一下，「……佢好似無發現我地……佢入左間餐廳啊。」

我地一行四人之後都跟左入果間餐廳，坐左係一個與南亞青年比較遠嘅地方。

「佢係果邊啊。」珍妮話：「但得佢一個人嘅？」

小段諗左一陣後就話：「可能佢約左人呢。」然後佢再仔細咁望一望果位南亞青年，「等等！？原來佢拎住左個公文袋架！」





就係小段呢句話，令到我地幾個都望向南亞青年，然後異口同聲說：「份報告！？」

與此同時，南亞青年好似向一個人揮手，而我地又望一望回應佢果一個人，「唔通呢個係接贓果個人。」天語望住回應南亞青年果個人推拷得出左呢個諗法，但係我、小段及珍妮，望到回應南亞青年果個人，一定唔會有呢個推拷，因為……

「點解細路祥會係度嘅？」珍妮問，而小段一樣呆左望住我。

佢地兩個係蔡老闆嘅喪禮上，與細路祥有一面之緣。

而我就更加唔知道點解南亞青年會約左細路祥。