[年齡無界限] 就係咁，我最近出席好多喪禮: １１３　無奈嘅答案

同小段處理完銅ＳＩＲ比我地嘅煙盒針孔機後，落左樓下嘅茶餐廳食飯，叫好左野食，我都只係眼光光望住。

「輝爺仲咩唔食啊？」小段問我。

而我就先嘆左一口氣，「最近發生左咁多事，我真係消化唔切……」

小段聽到後都同我嘆左一口氣，「……又真係發生左好多事，而且真係無估到會發生到咁。」

我點一點頭，「唔講呢Ｄ，轉個話題，今日珍妮無跟住你嘅，佢點啊？」





「佢話今日有個地方要去，好似話係同佢爸爸媽媽有關。」小段話。

「希望佢尋親順行啦。」我答完後，兩個靜左係度，睇黎呢個話題轉得唔係幾好。

「……輝爺啊。」小段開聲話：「其實當年你只係為左生個仔先假結婚？」

我點一點頭。

「就係咁簡單？」小段又問。





「咩簡單啊，你知唔知有仔延續下一代係幾咁重要啊，而且你可以望住自己血脈可以得以延續ＷＯ，唔簡單架。」我答佢。

而小段就諗左一諗後話：「你同珍妮真係好唔同。」

聽到小段咁講後，我就問佢：「點解咁講？」

「我唔記得講左Ｄ咩野講到生仔呢個話題，然後佢好直接同我講佢一定唔會生，一來可能因為佢嘅經歷，二來，佢話香港唔係一個適合生仔嘅地方，如果要生都唔會係香港生。」小段講完後，我疑問左一下話：「香港唔係一個適合嘅地方？香港醫療設備咁齊都話唔好，仲有邊度好？」

「我果陣都係咁同珍妮講，不過佢話，生仔唔係睇一時一刻，而係要睇長遠，無錯係香港生仔後，教育醫療等等真係好好，不過香港仲邊有地方住到人。」當小段講到珍妮所提及嘅土地問題後，我靜左一諗，「咁又係……」無奈嘅答案，可能好多香港人都係咁諗。





「輝爺，唔好話住唔夠地方，有時做我地呢一行，過左生嘅人都唔住有無地方放啊。」小段話。

沉重嘅心情更加沉重……

然而，又係小段開聲，「輝爺，其實你有無怪過你前妻啊？」

「點都會有。」我答佢：「但再諗返頭先我地所講嘅野，其實佢都係想為個仔想盡方法拎一個生活好Ｄ嘅環境。」