[年齡無界限] 就係咁，我最近出席好多喪禮: １１２　又多一盒

同小段拎左個煙盒型嘅針機返去後，我地就諗緊應該放邊到之餘Ｄ人又唔覺，裝緊果陣有唔會有人察覺我地裝緊野。

小段佢企左係走廊觀察左一陣，指住一條大水喉位問我：「放係果度得唔得呢？」

我望一望佢所指果個位，「應該可以。」

果個位唔會太高，我地可以好易就放到上去，而且如果放呢個位，應該可以直接睇晒成條走廊嘅野。

我同小段行去果個水喉前，拎住個煙盒打量成條水喉搵緊一個最適合嘅位置，「呢度啦不如。」小段所講嘅位，係一個同佢差唔多高度嘅地方。





「你放果陣記住斜少少咁影落去先見得晒成條走廊。」我同佢講。

「知道，輝爺你幫手睇水。」小段回應我。

而當小段放個煙盒上去嘅期間，有一舊野係水喉跌左落黎，我同佢望住跌落黎果舊野，呆左一呆。

「你咁論盡架，叫你放舊野上去跌左都有嘅，一陣跌爛左就死。」我同小段講，而小段則用一個奇怪嘅眼神望住我，然後示意自己手上果個煙盒後同我講：「我地果個煙盒係度ＷＯ，跌左果個唔係我地果個ＷＯ。」

聽到佢嘅說話後，我疑惑地望住跌左係地上面嘅煙盒，「咁呢個……」我拎起左佢，而小段就話：「可能呢個真係一個裝煙嘅煙盒呢……」





我打開左個煙盒然後比小段望一望，「我諗呢個唔係一個煙盒。」呢個係我同佢得出嘅答案。

我地對望左一陣後，小段問我：「咁點啊？」

我諗左一陣，「放我地果個上去先，一陣再算。」

放好左個煙盒針孔機後，我地就返入屋，而我手中就拎住頭先果部跌左落地上面嘅煙盒，裝好機後，小段就話左比銅ＳＩＲ知，而銅ＳＩＲ就話網好之後就無我地嘅事，只要等佢消息就得。

「仲有啊舅父，我地裝機果陣發現原來一早已經有人裝左一部類似嘅機會輝爺屋企附近。」小段同銅ＳＩＲ係電話嘅對話：「係……係……好，咁我一陣黎。」





小段收左線後，我就問佢：「銅ＳＩＲ講咩？」


「佢叫我拎頭先跌左果個煙盒比佢睇，仲有叫我地確部跌左落地既機要熜左先ＷＯ。」小段一講完呢句，我就即刻拎起左個煙盒，望到入面有部機仔，「我點知佢係開左定熄左？」