[年齡無界限] 就係咁，我最近出席好多喪禮: １０６　交換

第二日，我地三個約好左一齊去果間報館，而途中我當然問小段，睇下佢舅父果邊捉到偷我份報告嘅人未。

但係佢嘅答案係仲查緊。

而一去到間報館到，珍妮已經講明來意要搵天語，果邊嘅職員就話比我地知天語好少係報館，都係嘅，一個盡責嘅記者應該事不事出去搵料而唔係坐係度等運到。

咁我地唯有打比佢問佢係邊，好快就知道佢係邊度。

但珍妮同我地講左佢所在地後，我地有少少呆左……





「佢講果個地方係山上面架ＷＯ。」小段話。

而珍妮點一點頭話：「係啊，佢仲叫我地買Ｄ野上去食，佢未食野。」

無言……我地一行三人買左少少零食同面包去搵佢，但係佢比嘅地址……都已經唔可以話係地址，根本就只係一個地方名，成個山咁大，可以點搵……

不過當我地行到某個地方後，就收到天語嘅電話，佢用電話教我地行到佢嘅所在地，當到步後，我地真係呆左。

因為……我地望到嘅係一支勁長嘅相機，然後佢就好似一個打野戰嘅軍人一樣仲要化埋野戰妝，最勁嘅係佢仲有好多草黎做掩飾遮住佢部相機。





仲有……唔止佢一個人，仲有佢另一位同事。

天語一見到我地，就好開心咁衝向我地，「你地買左咩野黎啊？」佢一邊問一邊睇我地個袋入面有咩野食，不過佢睇完一輪就好失望咁話：「下次買多幾款唔同味薯片比我嘛。」

珍妮聽到呢句後，無奈咁話：「我鬼知妳想食咩啊，仲有啊，妳係度做緊咩？」

天語望一望佢身後果個架步，然後笑笑口話：「偷拍富豪囉。」

「犯法架ＷＯ？」小段問。





而天語又笑笑口話：「捉到嘅就係犯法，捉唔到嘅……ＷＨＯ　ＫＮＯＷ。」

我真心佩服呢一位男人婆嘅霸氣。

「係呢，你地今日搵我做咩事啊？」天語問左今日我地黎嘅重點。

「你上次未想知我果份報告Ｄ野嘅？」我問天語，而佢聽到我咁講後，眼前一亮咁望住我話：「係啊，你回心轉意話比我聽拿？」

「等等！」小段係呢個時候話：「幾多錢先？」我同珍妮不以為意咁痛打左佢一身，然後就同天語講：「我講妳知都得，但妳要將妳查到嘅野同我交換。

天語聽到後，諗左一諗話：「我呢Ｄ野係獨家野，你地如果可以確保自己唔講出去，我就同你交換。」

「可以。」我斬釘截鐵咁話。