[年齡無界限] 就係咁，我最近出席好多喪禮: １０５　男人婆

「有無搞錯啊點解唔叫埋我去！」望住眼前呢一位咆吼中嘅珍妮，小段呢一刻先體會到女人嘅可怕，但我呢Ｄ見慣世面，已經經歷好多個十年嘅老野，見慣晒啦。

「爺輝份報告咁重要，你報左警未啊？」珍妮問。

「報左，落左案拿。」我答。

「咁有無整親。」佢又問。

「少少。」我話。





「抵你架！邊個叫你唔叫埋我去ＷＯ！」珍妮一直耿耿於懷我無叫佢去陪我一齊拎份報告。

而小段見到珍妮不停咁講起呢件事，就話：「其實輝爺本身都無叫我去架，係我咁岩打比佢，佢話我知後我叫佢比我陪佢一齊去。」

珍妮聽到小段咁講後，好惡咁望住小段，「咁點解你唔同我講啊！下！點解你唔叫埋我去啊！」

兇狠嘅珍妮將目標轉到小段嘅身上，而小段就不停同我打眼色叫我救佢。

不過……我理佢都有味，係佢自己幫我解圍，我點可以破壞佢對我嘅好意呢，所以我都無理佢。





小段最後都不敵珍妮嘅攻擊，將頭先所發生嘅一切都講晒出黎，珍妮一聽完後，就叫小段將天語比我地嘅卡片比佢睇。

珍妮一睇完後就話：「呢間報館嘅記者，竟然係我上次帶你地去睇我登報尋親果間。」

我同小段聽到佢咁講後，望一望卡片嘅公司ＬＯＧＯ，「又真係好似ＷＯ。」

「天語……天語……」珍妮口中默念住呢個名，「好熟啊……我記得拿，佢先前係幫做登下報架咋，原來轉左去做記者，唔怪得無見佢咁耐啦。」

我聽到佢咁講後，好直接咁話：「妳識果個男人婆架？」對唔住，呢一刻嘅我比較直接左少少。





「係啊，我識得呢個男人婆架，佢有無同你講Ｄ咩野啊？」珍妮問。

而小段就同珍妮講：「佢話想知度輝爺咁著緊果份報告係Ｄ咩野報告，而且仲話會比錢買添……」小段又露出果個烚熟狗頭嘅樣。

我地望住咁嘅小段……無言……

「咁姐係呢排佢都可能跟住你ＷＯ，輝爺。」珍妮話：「唔通你之前話呢幾日好似有人跟住你，就係佢？」

聽到珍妮咁講後，我疑惑左一下，「其實我都唔知。」

而且，小段係佢嘅烚熟狗頭嘅笑容返左黎，「珍妮，如果妳識得果個男人婆，可唔可以叫佢幫下我地，話比我地聽佢打探到Ｄ咩？」

珍妮聽到後，不解咁問：「點解咁問？」

「係囉，點解咁問？」我咐和。





「天語講到單野同你個仔及前妻有關，你知多少少無壞姐。」聽完小段咁講後，我都覺得有Ｄ道理。

而珍妮都諗左陣，然後話：「我帶你地去搵佢都得，但你地要預左係交換情報，因為佢唔會白白講Ｄ野你地知。」

「得拿。」我同小段答。

「仲有，係佢面前你地記住忍口唔好叫佢男人婆啊。」珍妮話。

「……知……知道。」我同小段答。