[年齡無界限] 就係咁，我最近出席好多喪禮: １０２　天語

今時今日拎到份報告嘅果一刻，都好似我幾十年前拎到嘅一樣心情。

「輝爺，如果你唔想開嘅話，我可以幫你。」小段坐係我旁邊話。

但我，搖頭拒絕左佢嘅好意，「有Ｄ事，要自己面對嘅始終都要自己面對，等我有足夠心理準備嘅時候，我就會打開拎一份報告。」

離開銀行後，我同小段仍然並肩而行。

「輝爺啊，如果……我話如果咋，如果份報告真係話龍仔唔係你親生嘅話……」小段無將佢全句講晒，但都已經講左佢所講嘅意思。





我望住仲未開嘅報告，「如果龍仔真係唔係我親生仔嘅話，我做咩野都改變唔到。」

呢個應該係所有人都應該會講嘅答案。

然而，行到唔夠幾條街，小段就同我講：「輝爺，你覺唔覺有人跟住我地？」

我向佢點一點頭，「我以為係我疑神疑鬼，但你都有呢一種感覺嘅話，姐係唔係我感覺錯。」

我同佢同時望向身後，但係察覺唔到有咩野奇怪。





「……我諗我地都係快Ｄ……」我野都未講完，就有一個人衝向我地撞開左我，仲搶左我手上面嘅報告。

「我份報告啊！」我大叫，而小段就係追左過去，而當我起身果陣，我見到面前跑緊嘅有三個人，其中一個係搶左我份報告嘅人，睇得出佢嘅身型係果位南亞裔青年，而第二個當然係幫我追緊嘅小段，而第三個人，係一個我唔識嘅人，我只係見到佢戴住頂帽，手上面拎住部相機，好似一也想跑上去幫我咁。

我年紀已經咁大，想追嘅話都追唔到，就算追到都幫唔到手，所以我只可以漫無目的咁係條行度向前行，慌張，因為驚唔見左份報告，但又有一份鬆一口氣嘅感覺，可能，都係因為唔見左份報告。

到最後，小段追唔到搶我份報告嘅果個人，佢走返黎搵我，一見到我就同我講：「輝爺……果個人……好似係……係果個南亞裔人。」

我對小段點一點頭，「係。」但係我嘅目光就放左係佢身後面，果位行緊黎我地嘅人。





小段察覺到後望一望身後，咁岩果個人都行到我地面前，佢拎左一張卡片比我地，「你好啊，頭先果個人真係跑得好快。」

小段接過張卡片，「記……記者？」

而我就望一望卡片上面嘅名，「天語？」

「係啊，我叫做天語。」再望一望，原來呢個著到咁男仔打扮嘅人，係個女仔黎。