[年齡無界限] 就係咁，我最近出席好多喪禮: １０１　保險箱

就如呢幾日都有嘅感覺，仲係覺得係我背後有個人跟住我地，就算小段同我一齊行我都疑神疑鬼。

「輝爺，點解你無啦啦又會去拎份報告嘅？」小段一邊行一邊問。

「果日我前妻嘅要求。」我答佢。

「要求？」小段問。

我同小段企左係門口前面，而我就同小段講：「一陣入到去先講。」





同個經理講要係保險箱拎返份報告，經理請左我地兩個入等候室等。

小段飲住經理招待我地嘅紅茶，然後問我：「輝爺，而家可以講未啊？」

我嘆左嘆氣話：「係我同前妻結婚前，佢同一個男人一齊左好幾年，而家果個人發左達，小桃紅想用呢份報告證明龍仔唔係我嘅仔，可能係果個人嘅仔，所以，叫我拎份報告比佢。」

小段聽到後，先係驚訝，「咁都得！？但係你都唔知份報告嘅結果，如果份報告話龍仔係你個仔，咁佢拎黎都無用架。」

我又真係無諗過小段所講嘅野ＷＯ。





「仲有啊，點解唔叫果個男人同龍仔去驗？而要你去拎呢份報告出黎？」小段又問。

「我都有問你呢個問題，我前妻話因為對方而家可能會覺得佢係因為果個人發左達先返去搵佢，叫佢認頭，所以唔會合作，如果要證明，就只有呢一份報告。」我講完後又嘆一嘆氣。

「但係，就算份報告話你同龍仔無血緣關係，都唔代表龍仔係果個男人嘅仔ＷＯ。」小段話。

果然，永遠都係旁觀者清，當局者迷。

「……我唔知。」我話。





「咁點解你要答應你前妻拎份報告出黎？」小段問。

「因為……」我欲言又止話：「因為佢話如果我答應佢，就算龍仔唔係我親生，都會比佢等我以後死左，拜下我，等我有仔送終……」

「……咁……咁都得？」小段做得呢行，都知道好多老人家好著重呢件事，所以佢都無咩野反駁。

然後，我等沉默地等經理行出黎，佢拎坐果份報告，睇黎，等左咁多年嘅結果，始終都要開封。