[年齡無界限] 就係咁，我最近出席好多喪禮: １００　一連串嘅開端

又好頭痛，又係有碗薑茶係枱面，就同上一次細路祥送我返屋企一樣，記返起尋日去左阿然度賣醉，講左好多當年佢唔知嘅事比佢知。

記身後，見到電話有好幾個ＭＳＧ，有小段嘅ＭＳＧ、有珍妮嘅ＭＳＧ，仲有一個係我無咩點見過嘅名，係小桃紅。

小桃紅：記得我尋日同你講過嘅說話，今個星期日記得拎份報告比我。

呢個係果一日同小桃紅最後嘅結論。

其實我好唔想比份報告佢，但係佢話……我都唔想再提。





起身後，我第一時間就係去銀行，因為我想呢件事早Ｄ解決。

一出到門，經過果個南亞裔青年住嘅地方我仍然份外小心，直到入升降機前，我都望室佢個單位，因為我驚佢會出現。

不過好好彩，佢今次無出現，我好安心咁出發去銀行。

然而，呢個時候我部電話響起，係小段。

「輝爺你無事嘛？」小段問。





「無。」我好簡單答左佢。

「你而家係屋企？」小段問。

「唔係，我而家去緊銀行。」我答。

「去銀行……做咩事？」佢問。

我遲疑左一陣好唔好話佢知，最後我都係講左：「……我要去拎份報告。」





而小段都靜左一陣話：「你等下我，我陪你去。」

估唔到，呢一個舉動會做成以下一連串嘅事。