[年齡無界限] 就係咁，我最近出席好多喪禮: ９２　可疑嘅二人

同平時一樣，一個人嘅回家路上，但今日心入面特別驚，因為總覺得身後面有人跟住我……死啦，點算，如果一陣佢衝過黎搶我嘅野，我唔會夠佢搶架ＷＯ。

點算呢？而家呢個鐘數，呢條街無咩人添架，出左事點求救呢？

電話！但係如果係我拎電話出黎果陣，果個人就衝過黎搶我部電話，咁我未求救唔到囉！？

點先可以……「輝爺！」「啊呀！！！！！！」死拿！真係衝左上黎搶我野啊！點算……等等，點解個賊識得叫我做輝爺嘅？

我回頭一望……「人嚇人無藥醫架！！！」我衝口而出嘅一句話，因為我見到眼前嘅人，係珍妮同小段。





頭先拍我膀頭嘅人，係珍妮，「點鬼知你咁細膽啊。」

而小段，就係佢旁邊好尷尬咁笑話：「我地係黎……」

「你地出現就啱，陪我返屋企。」我捉住左佢地兩個大步大步向前走，而佢地兩個都比我拉到差Ｄ跌咁滯。

行到多人嘅地方，我先無咁驚放慢返腳步，而珍妮就鬆開手話：「輝爺睇唔出你咁老都可以行得咁快ＷＯ。」

而我就同佢講：「妳唔知架拿，最後出現左專搶老人家野嘅賊，頭先我一個人行，不知幾驚，而且呢排我成日覺得有人跟住我。」





「咁唔怪得你頭先叫得咁大聲啦，原來你以為我地兩個係賊仔。」小段話。

我向佢點一點頭再問佢地：「係呢，你地黎做咩啊？」

「無啊，我地兩個目得閒無野做，而且又諗起未去過黎屋企，未黎探你囉。」珍妮呢Ｄ說話雖然聽起黎正正常常，但係係佢眼神中，我睇得出流露住一絲絲嘅古惑。

「……係啊。」再加上小段咁尷尬嘅笑容，我可以肯定，呢兩隻野一定唔會咁好死無啦啦入黎探我。

我用一個懷疑嘅眼神望一望佢地，然後話：「我屋企好亂未執，下次先啦……」「咁仲好！我地黎就係幫你執屋！」珍妮小姐，我唔係好信妳會好人到幫我執屋咁好死ＷＯ，我仍然用懷疑嘅眼神望住佢地，而珍妮又補多句，「你唔記得咩，我有返教會，牧師教我地要樂於做人，日行一善架。」





「日行一善係童軍黎架小姐。」小段都忍唔住要串佢。

「你唔幫手就唔好出聲啦。」珍妮話。

我愈睇呢兩條友就覺得愈可疑。