[年齡無界限] 就係咁，我最近出席好多喪禮: ９３　執屋？

坐係屋企入面，望住四圍搵緊唔知Ｄ咩嘅珍妮同小段，我可以十足肯定，呢兩條友係為左我果份未睇過嘅ＤＮＡ報告而來。

望住佢地不時怕我聽到而特登好細聲咁講野，但佢地又唔知到其實成間屋得佢地兩個把聲邊會有人聽唔到……

「你果邊有無啊……」

「無啊……你果邊我搵過好多次，唔駛搵果邊啊……」

「唔通係廁所……」





「我頭先入過去搵都唔見有……」

我真係服左佢地……不過見佢地兩個搵到咁，其實係旁邊睇都幾好笑，所以我無阻止佢地，坐左係度扮晒唔知佢地搵野，一邊睇電視，一邊扮野叫佢地打掃邊度邊度咁。

其實瑞士返黎之後，我第一時間返屋企後就拎左份ＤＮＡ報告出黎，不過我最後都無勇氣去打開呢一份報告，只不過，我將佢放左去另外一個地方。

銀行嘅保險箱。

無錯，而家任小段同珍妮點反轉間屋，佢地都唔會搵到果份報告。





最後佢地搵左成個鐘後，對望左一眼後露出左一個失望嘅眼神，放棄嘅二人行到我身邊坐低，我就扮晒野同佢地講：「真係唔該晒你地上黎幫我執野。」

而珍妮嘅性格，佢得唔到佢想要嘅野一定心心不憤，所以佢面對我嘅說話，選擇左沉默，而小段見到咁嘅情況，就打圓場話：「……傻啦，我地出自真心上黎幫你，多咩野謝ＷＯ……」佢不停用手撞珍妮，珍妮先死死地氣話：「係啊，係啊。」

我倒左杯茶比佢地兩個飲，然後就話：「打掃左咁耐，反轉左成間屋，你地都累架拿，所有野你地都搵過晒……」呢個時候我停左一停，望住佢地兩個，而本身剛剛拎起杯茶嘅二人都停止左動作，望住我。

而我就繼續講：「搵唔到，唔駛灰心ＷＯ。」然後我笑左一笑。

「啊呀！！！！！」珍妮憤怒咁咆吼，然後好大力一野打左小段一下話：「輝爺一早就知道我地上黎係想做咩野啊！」





「喂，咁佢一早知道左唔關我事ＷＯ，做咩要打我？」小段好無奈咁望住珍妮話。

「輝爺咁撚蠢，佢點會咁叻估到啊，一定係你扮得唔夠自然，所以輝爺先知道。」珍妮，蠢還蠢可唔可以唔好加個「撚」係前面……仲有，咩我係妳心目中係咁蠢架咩……

「痴線，唔比係妳扮得唔夠自然，而且上黎呢度搵份ＤＮＡ報告呢一件事本身已經唔係一個自然嘅事，妳點扮都唔會扮到好自然啦。」小段呢一句又講得好啱ＷＯ。

望住佢地兩個鬥咀，我笑左出黎，然後話：「多謝你地關心，第一件事啦，我其實唔蠢嘅，頭先返緊黎果陣我已經諗到你地黎嘅目的，第二件事，係我已經將份ＤＮＡ報告放左係銀行報險箱，所以你地點搵都搵唔到架拿。」

二人聽到我呢一句說話後，齊聲話：「咁你唔早Ｄ講！」

「咁你地唔早Ｄ問，我未唔講囉。」我笑住答。

其實佢地上黎探我，我真係好開心，因為我呢個家好耐都無試過咁多歡笑聲。

但原來係呢個歡笑聲背後，有一個人係不裹處監視緊我地嘅一舉一動……