[年齡無界限] 就係咁，我最近出席好多喪禮: ８９　我地幫你？

我個仔當年其實係唔足月所生，所以我一直都懷疑龍仔係唔係我個仔，不過又因為面子嘅問題，我拎左份報告後又唔敢睇，更何況，醫生話我精子不活躍，好難令到女性受孕。

所以我更加唔敢睇呢一份報告。

一直而黎，呢一份報告都收係個鐵罐入面，無咩事我都唔會拎呢個鐵罐出黎，因為每次望到呢一份野，就好似有一股力量叫我去面對呢個事實。

我同我個仔嘅關係，就好似你地所見一樣，其實我都知道，係佢嘅眼中根本無我呢一個阿爸嘅存在，而我係佢心目中嘅存在價值，就等於一部隨時都可以拎到錢嘅提款機一樣。

我亦都明白，我唔應該每一次都答應佢所有嘅需求，但係重男輕女嘅我，始終有一個心願，就係可以抱孫，但係見到龍仔一日復一日嘅生活，我就知道我呢一個心願係遙遙無期，我只可以做嘅，就係不停提供佢所需，令到佢早Ｄ可以成家立室……





「你咁諗野未錯晒囉。」珍妮聽到呢度開聲話：「根本佢已經寵壞晒，人都咁大過你就咁樣對佢，你呢Ｄ唔係幫佢，係害佢啊，更何況你想話抱孫ＷＯ，咁樣落去我勸你都係打消呢個念頭好過。」

我望住坐係珍妮旁邊嘅小段，用手輕拍珍妮話：「妳駛唔駛咁直接啊。」

「大家都係成年人，點解唔直接Ｄ啊。」珍妮講嘅野，都有佢嘅道理。

我好明白，我呢一個心願係我有生之年係唔會實現到，而我更加明白，其實我咁對龍仔，已經害左佢一生。

有時我有回望返，其實，當初我為左生仔而假結婚呢一個決定，到底係啱定係錯，如果無呢一場假結婚，發生嘅事情會唔會有轉變。





但係時間邊可以返轉頭，就好似先前講落，呢個世界點會有如果。

「咁份ＤＮＡ報告真係仲未拆？」珍妮問，而我向佢無奈地點一點頭，而跟住珍妮提出左一個建議，「如果你唔想睇，不如我地兩個幫你睇？如果你真係唔想知，最多我地兩個睇完唔講出黎。」

「喂，妳傻左啊，呢Ｄ野係輝爺嘅家事，我地咁多事仲咩ＷＯ。」

「咁而家爺輝佢唔敢去面對嘛，我地做朋友嘅幫佢面對有咩所謂ＷＯ。」

「唔係有無所謂囉，我覺得妳係因為八掛先想睇。」





「你唔想知嘅，你有塊鏡照下你而家個樣，已經出賣左你啦，你都不知幾想睇。」

小段同珍妮不停咁鬥咀，而我就坐係旁邊好靜咁睇住佢地，腦入面不停ＬＯＯＰ住珍妮頭先果一句，因為，我真係有一刻心動，想佢地幫我睇呢一份ＤＮＡ報告。