[年齡無界限] 就係咁，我最近出席好多喪禮: ８６　秘密交換的飯局

跟珍妮去到茶餐廳後，見到佢好快就回復狀態，我同小段見到佢咁都見怪不怪，佢一坐低就叫勁多野食，基本上我同小段唔叫，我地三個人都夠食。

係野食黎之前，珍妮望住我同小段話：「我講左我嘅秘密你地知，你地係未應該都講返一樣差唔多嘅秘密我知呢？」

面對珍妮突然嘅問題，我同小段都打左個突。

「好似係妳自己講，我地無叫到妳……」小段想講嘅野，比珍妮嘅凌厲眼神望到唔敢講落去，然後呢個凌厲眼神落到我個身上，「咁……咁妳想知Ｄ咩？」我問。

而珍妮諗左諗後話：「其實輝爺你Ｄ野收到咁埋，我都唔知想知Ｄ咩……有拿，你就講下你同你個衰仔之間嘅野我地知啦。」





「喂，妳駛唔駛咁直接話人係衰仔啊。」小段話。

「你理得我，仲有啊，我上次問你個問題，你未答我，就呢次機會答我啦。」珍妮講完後，小段有少少難言之隱咁話：「真係要講？」

「係啊。」珍妮答，而我就好奇問佢：「上次你問小段Ｄ咩野？」

「我問佢點解要做呢一行，無理由無啦啦想入呢一行掛。」珍妮想問嘅問題，其實都係我一直最想問嘅問題，估唔到珍妮已經咁直接問左。

唔知會唔會同銅ＳＩＲ講小段有秘密嘅野有關呢？





小段望一望我地兩個，嘆左口氣話：「好啦，見係你地兩個，我就講你地知啦。」

佢突然坐直左個人，一臉認真整到我同珍妮都打醒十二分精神聽。

「我以前，其實唔係做殯儀，係做保險。」小段話，而我回想起先前，「唔怪得上次問你點解唔做保險，你會有咁嘅反應啦。」我話。

「咁點解你要轉嘅？」珍妮問：「以你咁吹得水，有咁厚面皮，你賣保險一定仲多錢賺ＷＯ。」

小段聽完珍妮嘅說話後，笑左笑話：「妳咁樣算係讚緊我啊……不過其實妳都講得好岩，我以前做到帶ＴＥＡＭ，月月嘅數都係前列果幾位，年年都會拎杰出員工獎，果陣我好睇重呢Ｄ野，但係而家，只係覺得呢Ｄ野可唔可以換返當年已經失去左嘅野。」





「失去嘅野？」珍妮問。

小段無正面答珍妮呢一個問題，佢繼續講：「我入呢一行，係因為我死左嘅阿爸……」小段深呼吸左一啖氣，「同埋我個前女友。」