[年齡無界限] 就係咁，我最近出席好多喪禮: ８３　世事有無真係咁……

我同個女坐多左一陣，「我走先拿。」我話，而阿芳佢就問我：「你唔見下阿媽？」

我搖一搖頭，「次次見佢都會比佢鬧話見面會當黑就唔好見，我費事無啦啦有比佢鬧多次。」

「你仲怪阿媽咁迷信？」阿芳問。

「唔係迷唔迷信嘅問題，而係果個人根本就呃緊佢，根本就係神棍，咁樣點解要信。」我將我心底裡嘅說話講左比阿芳知。

然後，又回到沉默嘅情況。





「算啦，妳好好睇住妳阿媽，我走先。」講完呢句後，我就轉身離開，任由阿芳係後面叫我，我都無理佢。

入左升降機後，成個身都鬆晒，可能係覺得終於可以脫離頭先嘅境況掛。

不過無諗過一開門，就聽到一把好熟嘅聲……

「你諗下ＷＯ，如果要幫親人搞身後事，但你自己又唔識唔知價，到時真係用多左好多冤枉錢你自己都唔知架。」點解又係小段呢……

不過我而家見到小段，都下意識咁望一望佢身邊嘅人，睇下珍妮係唔係度，不過今次就得小段佢一個人。





「先生，考慮下，你唔為你自己諗，都為你親人諗啦，好話唔好聽，到時唔係你幫人搞，可能係人地幫你搞呢。」其實除左做保險外，我諗做小段呢一行係會同做到好似咒個客死咁，定係只有小段係咁呢？

見佢同果個人傾完後，我就行到佢身後面，扮聲咁問：「後生仔，你係未幫人搞身後事架？」

未見到小段個樣，只係聽佢應我把死人聲，「係啊老細，有咩關照啊。」就知到佢而家個樣係幾烚熟狗頭。

而小段一望到係我後，先係嚇一嚇，然後收返起烚熟狗頭嘅表情，轉為一個有少少失望嘅樣話：「輝爺，又會係度見到你嘅。」

「我探個人姐，你係度搵客啊？」我問。





小段答：「係啊，多勞多得嘛。」

「珍妮呢？」我問。

「佢唔得閒啊今日……等等，珍妮嘅野你問返佢未得囉，做咩要問我？」小段答。

「咁你又答我。」我笑住話。

「輝爺你唔好玩我啦，係呢，我之後有搵返我舅父，佢同我講返之前幫你搵野嘅事，仲托我問下你果個人仲有無煩你。」小段話。

「最近無，如果有我一定話你知。」我答。

「好啊，但如果係有客話我知，我會開心Ｄ。」小段答。

呢個小段真係呢……不過同佢ＦＲＩＥＮＤ左之後，都知道佢份人無想像中咁貪錢，而且佢都係為左工作先咁做，但至於果陣銅ＳＩＲ講嘅野，小段嘅秘密，我就一直都想問，但係有又無呢個機會。