[年齡無界限] 就係咁，我最近出席好多喪禮: ８２　名份

瑞士返左黎後個幾星期，生活都好似先前咁樣。

小段同珍妮有時得閒都會搵下我飲茶，阿然都不時打電話比我，同我講我支存酒仲有好多，記得多Ｄ去佢度飲。

而小慧，我都有搵下佢，佢同平時一樣做日常嘅野，唔同嘅係佢唔駛再去醫院，不過珍妮有同我講，小慧佢打算去瑞士住，話可以同志威比較近，想睇下佢都易Ｄ。

其實小慧有呢一種諗法都正常，但有幾多人又真係做到就唔知。

其實返左後幾個星期，我都諗緊一個問題，我應該幾時去搵我老婆同個女好？但通常呢Ｄ野諗諗下就會好主動咁搵上門。





就好似今日，我收到阿女個電話。

睇黎，要做嘅野始終都要做，我再係個高櫃上面拎左個罐出黎，打開後拎左份保單，打左個電話，係打比個保險經紀講加名嘅野。

然後，我就起行去醫院。

我老婆住左醫院好耐，佢唔係因為大病先住咁耐，而係斷斷續續咁住院，但我從來都未去過探佢，今次，係第一次。

我唔去探佢嘅原因係咩？講出黎你地都會笑，其實並唔係我想見，而係我呢個老婆好迷信，佢話有次行街買野果陣，有個三唔識七嘅人走去佢面前，話佢同我個命傷克，要用好多錢去化解……





聽到呢到你地都會估到佢係比人呃左啦，但係佢唔信啊，佢信個神棍，拎左好多錢去比佢作法，事後就不停話我同佢唔可以見面，如果見面會克埋自己Ｄ仔女。

就係咁，我同佢無見好耐，係因為佢迷信。

去到醫院，我見到阿芳坐左係病房門外。

「妳阿媽呢？」我呢一個係明知故問。

「係裡面。」阿芳答。





然後，我地就無咩對話。

坐左好幾分鐘後，我先再開口，「我同保險經紀傾過，想加妳個名落份保單入面。」

「做咩無啦啦改變主意？」阿芳問。

我望一望佢，睇得出佢對我呢個決定好開心，而我就同佢講：「好話唔好聽，我同妳阿媽都咁老，是但一個走左都要Ｄ錢搞身後事，如果我唔落妳名，剩係比晒Ｄ錢我個仔，我覺得，佢先唔會幫我搞。」

「所以你加名嘅目的，只係為左我可以幫妳搞身後事？」阿芳問。

「……嗯。」我老實咁點一點頭。

阿芳聽到後，頭先開心嘅表情目左，且而變左有少少不甘心，「好啊。」

其實一直以黎，阿芳同我老婆想加名落保單上面，唔係為左份賠償，而係為左個名份，因為我同我老婆，其實未正式註冊。