[年齡無界限] 就係咁，我最近出席好多喪禮: ８１　彩虹

我地係公園入面搵左張長椅坐，呢一張長椅，係志威臨走前一晚，小慧坐係度喊嘅長椅，佢叫珍妮同小段去行下，而留下嘅，就變成我同小慧單獨兩個。

「唔知，志威而家上左天堂未呢？」小慧望住個天話。

而我聽到佢咁講後，都望一望個天答佢：「可能，佢已經匿埋左係某舊雲上面，偷睇緊我地。」

「可能係。」小慧微笑話。

「阿輝，多謝你係志威最後一程路上出現。」小慧話，我睇得出佢好感恩咁講。





「妳同妳個女講埋嘅野真係似樣。」我話，而佢用一個不解嘅眼神望住我，我就答佢：「妳個女多謝我送佢老豆一程，而妳就多謝我係志威最後一段路出現，仲唔係似樣？諗深一層，我對你地兩個嘅恩情都好大下ＷＯ。」

小慧聽到我咁講後，笑到合不攏嘴話：「咁你想我地點還？」

我諗左一諗後好認真咁望住佢話：「繼續開心幸福咁生活落去，有咩困難一定要搵我。」

小慧聽到後，微笑咁答我：「知道拿。」

其實我之後都有諗過呢一刻，如果我同小慧講希望佢同我一齊……唔好有咁嘅眼神望住我，我都知我已經一把年紀……係係係……仲有個老婆唔好搞咁多野……





但係都比我幻想下好ＷＯ，而且最後我都無咁講，只係叫佢要繼續幸福生活落去。

其實有時當一個人真係面對呢Ｄ情況，出黎嘅結果，會比佢思想上踏實好幾倍。

「估唔到志威走左後，珍妮都可以咁堅強。」小慧突然轉左話題。

「珍妮？」我話：「今朝蕎兒搵我傾左陣，都講左珍妮嘅事比我知。」

小慧聽到後，微笑地嘆左口氣，「其實我一直都想改變珍妮嘅想法，但始終都只可以改變到少少。」





「其實珍妮係一個咁矛盾嘅女仔，真係好辛苦。」我話。

「係架，所以我花左好多心機去照顧佢，多到有時蕎兒都會呷醋。」小慧笑住咁話。

「唔係掛。」我回應。

「係架，你唔好睇我個女咁大又生左仔女，呷起醋上黎唔係人咁品架。」小慧話。

睇住小慧嘅微笑，我真係放心好多，雖然我明白當身邊有親人離去，心中一定放唔睇，不過如果心境可以好似小慧而家咁，一切事都好快睇化。

突然間……

「契媽！妳睇下果邊！」估唔到隔咁遠，都可以聽到珍妮嘅大叫。

我地望向珍妮所指嘅方向，見到一條彩虹出現。





「又會咁搞笑嘅，好似無咩點落過雨，但又會有彩虹。」小慧企左起身望住呢一條彩虹。

「可能，係天堂嘅志威用妳嘅眼淚，送比妳嘅禮物。」我話。