[年齡無界限] 就係咁，我最近出席好多喪禮: ８０　公園閒談

平時見珍妮成日都好開心，原來佢背負住咁嘅傷痛，聽完蕎兒嘅說話後再望一望呢一個女仔，究竟，佢呢種開心係扮出黎，定係發自內心？

踱步係公園入面，珍妮同小慧行係我同小段前面。

「你知道珍妮孤兒同色盲嘅事？」我問走係我身邊嘅小段，而佢聽到我咁問佢後，微笑左一下話：「珍妮講你知？」

我搖一搖頭，「係蕎兒話我知。」

我地靜左幾秒後，小段再開聲話：「未睇珍妮個人成日都好開心咁，其實佢時不時會匿埋一個人傷春悲秋，我記得第一次珍妮果日，係我剛剛入殯儀呢一行嘅第一個星期，果陣跟果個師父叫我邊執頭執尾邊學野嘅，有次要搬紙紮果陣，我一路搬一路聽到有人喊緊，果陣我仲以為我時運低撞野聽到女鬼喊，但後來見到珍妮一個人踎左係角落，拎住個公仔係度喊緊。」





「咁嚇人。」我笑住咁話。

「就係啊，果一刻勁似回魂夜入面個保安以為個阿婆返黎食雞脾，嚇到我個心都離一離，行近佢先發現佢喊到收唔到聲，問佢幾次後，佢先話我知佢點解會去喪禮。」小段講到呢度，笑左一笑話：「唔知呢Ｄ係未緣份呢，如果我果陣唔係入左殯儀呢一行，可能都唔會識都珍妮。」

「你鐘意珍妮？」我好直接問小段，而小段聽到我咁問佢，好尷尬咁話：「係我唔識得收埋自己嘅情感，定係你閱曆多所以睇得出？」

我聽到小段嘅說話，都笑左一下，然後佢就繼續講：「我係有少少鐘意佢，但我知道，佢唔會鐘意我。」

「點解呢？」我問。





「唔知呢，但係通常鐘意一個人，都好易感覺到對方對自己有無意思，而且識左珍妮一段時間，我感覺到嘅，唔只係佢對我有無意思，而係佢好似對愛情毫無感覺。」小段話。

我好明白小段嘅說話，因為由識珍妮到而家，都只會感受到佢好收埋自己，可能，呢樣野係因為佢父母離棄佢先令珍妮咁。

係珍妮同小慧背後，望住佢地兩個，小段淡然講左一句：「其實，如果珍妮無契媽同契老豆睇住佢，可能，珍妮已經一早唔係呢個世上。」

呢句話，令我諗起珍妮係蔡老闆喪禮上面講過嘅野……

……我究竟幾時會死？





珍妮講呢一句唔係偶然，而係發自真心。