[年齡無界限] 就係咁，我最近出席好多喪禮: ７９　矛盾

坐係長椅上面，細想往時期間，蕎兒行到我身邊坐低，「多謝你黎送我阿爸最後一程。」

我微笑左一下話：「如果，我早Ｄ遇返志威就好。」

「呢個世界，邊會有咁多如果。」蕎兒話，然後望一望我手中本校刊問：「阿爸，係未又寫左Ｄ野係最後一頁？」

我聽到蕎兒講呢句後就問：「點解妳講又？」

「因為，阿爸佢托小段將三本校刊，分別交比你、阿媽，同埋珍妮。」蕎兒話。





「珍……妮？」我問：「點解要比佢？」

蕎兒笑左一笑話：「珍妮呢個傻女，需要更多嘅人鼓勵。」

「其實我都有聽妳阿媽講過，佢話珍妮係一個樂天又悲觀嘅人，咁矛盾，珍妮背後有Ｄ咩野秘密？」我問，但係蕎兒無理我嘅問題，佢只係問返我：「我可唔可以睇下阿爸寫左Ｄ咩比你？」

我呆左呆，然後比左本校刊蕎兒，蕎兒即刻睇最後一頁，一路睇一路笑，「阿爸真係好重視你呢一個好朋友。」佢合返本校刊比我後，就答返我頭先問嘅問題：「珍妮，佢係一個孤兒。」

「呢個我知道，珍妮都有同我講過。」我話。





「但係珍妮點解變成孤兒，呢個係佢一直都想知嘅問題，由佢有能力自給自足開始，佢就用盡所有方法去搵佢嘅父母，請私家偵探、登報尋人、托教會嘅人幫手搵、甚至諗一Ｄ好奇怪嘅方法，就好似佢一有時間，就會去唔同嘅喪禮，佢話人總有一日都會去果Ｄ地方，可能，佢有一日會係果度搵返自己嘅父母。」原來，珍妮成日出席喪禮係咁嘅原因。

「但係如果真係比佢係喪禮想見返佢嘅父母，都唔係一件好事，可能係因為佢父母其中一個死左呢？」我話。

「我都有同佢咁講過，但佢答返我話可能佢地只係出席朋友嘅喪禮，如果真係咁唔好彩，都可以當係做女嘅一種孝心。」蕎兒話：「不過我知道珍妮其實一方面好想見返佢父母，但另一方面又唔想係喪禮上面見返佢父母。」

「……又係另一個矛盾。」我話。

「係，珍妮就係一個咁矛盾嘅女仔，但係呢一種矛盾，造就左佢堅強。」蕎兒話。





「唔怪得上次朋友喪禮上面，聽到小段同佢嘅對話，好似珍妮搵緊人咁，原來佢一直都搵緊自己嘅父母，我記得當時珍妮手中仲拎住一隻公仔。」我話。

「果隻公仔，我聽珍妮講，係佢未做孤兒前，佢媽媽同佢一齊親手整。」蕎兒呢一句說話，令我問佢：「珍妮有見過自己父母？」

「係，佢話係佢細過嘅時候，有一日佢父母帶左佢去一個公園後，就以後無再出現，真係一個好老套嘅故事。」無錯，真係一個好老套嘅故事。

「你見到果個公仔，係未破爛，Ｄ布料五顏六色好唔襯果隻？」蕎兒問。

「係啊，就係果隻。」我答。

而蕎兒聽到我嘅答案後，嘆左一口氣話：「其實珍妮仲有一個秘密，就係佢係一個紅綠色盲嘅人。」

紅綠色盲！？唔怪得有次我話前面有紅ＶＡＮ佢唔知啦。

「佢自己一直覺得，佢父母唔要佢，係關佢係紅綠色盲，佢一方面好想見到佢父母，另一方面又好恨佢父母點解為左紅綠色盲呢件事唔要佢……好矛盾，真係好矛盾。」蕎兒話。