[年齡無界限] 就係咁，我最近出席好多喪禮: ７７　志威的喪禮

係一間小教堂入面，人數兩隻手數得晒，不過呢個係志威嘅遺願，佢唔想咁多人出席佢自己嘅喪禮，只想佢人生中最重要嘅人出席就可以。

志威嘅靈柩放左係教堂嘅前面，而佢所邀請黎嘅牧師就係講臺前面，拎住志威死前交待佢講嘅紙。

「志威兄弟，係我地心目中，總係一個對任何事都堅持到底嘅人。」無錯，志威係一個咁嘅人，「但係，志威兄弟佢亦都有講過，佢呢一份堅持並唔係因為自己，而係因為佢身邊嘅你地，今日出席嘅人，都係佢人生入面最重要嘅人，係佢人生入面令佢對每一件事都堅持嘅人。」

「本來佢以為今生會帶住一個遺憾走向死亡，但當佢見到呢位好耐無見嘅朋友阿輝再次出現係佢嘅面前後，佢就相信，世上有一樣野唔係堅持就可以得到，世上仲有一樣野叫奇跡，佢好感謝造物主係佢死前送一份咁好嘅禮物比佢，見到呢一位朋友，佢諗起當年一件對唔住佢嘅事，如果唔係呢件事，可能，佢呢一生都唔會有一個咁幸福嘅家，當年兩個人都鐘意同一個女仔，果位朋友知道呢件事後，不停咁鼓勵佢追小慧，到最後佢放棄，佢先可以係餘下嘅人生同佢妻子，小慧一齊享受呢一段幸福嘅日子，志威話如果有來生嘅話，佢會幫返呢位朋友，因為今生呢位朋友將呢個機會讓左比佢，佢要下一世還返呢個機會比呢一位朋友。」

聽到牧師所講嘅說話後，我嘅眼淚忍唔住流左出黎，配想一聲可笑嘅笑聲話：「志威，你同小慧嘅幸福唔係因為我讓個機會比你，而係因為同佢一齊共渡餘生嘅人係你，佢先可以得到幸福啊，你真係傻。」





企係我旁邊嘅珍妮見到我流眼淚，拍一拍我話：「契老豆係臨死前可以見返你，真係好。」

「嗯。」我點頭回應。

牧師繼續講：「小慧，你知唔知我今生覺得最大嘅成就，並唔係我讀書嘅時候拎過Ｄ獎，亦唔係我教出好多好叻嘅學生，而係當我每一日返到屋企，都可以見到向我微笑嘅妳，無論妳係做緊家務，無論妳係煮緊飯，無論妳做任何事都好，妳臉上面總會掛著呢個微笑，妳嘅微笑係我生存嘅動力，當年我患上絕症果一刻，其實我都好迷茫，但當見到妳嘅微笑，我就知道就算面前有幾大嘅難關，我都要堅持，因為我仲想繼續望住微笑嘅妳。」

「但係，原來有Ｄ野唔係我自己想像中咁簡單，當我抗癌成功後得到一身嘅後遺症，當我見到妳辛苦咁照顧我但仍然可以露出呢一個微笑，當有一晚，我聽到，妳係我旁邊喊，我就知道，呢個係我堅持下令到妳喊嘅第一次，我唔想，我唔想再見到妳咁辛苦，仲有蕎兒，仲有珍妮，我唔想再見到我身邊嘅人因為自己而辛苦落去，所以，請你地原諒我呢一個咁任性，咁硬頸嘅決定。」

我望一望小慧，見到佢喊緊，但係臉上依然有志威所講嘅微笑。





「今生嘅幸福，係我最唔捨得嘅野，但我知道，我嘅離去，會令你地得到更多。」呢一句，係志威最後嘅一句。

志威算擇左係瑞士土葬，係墳場到，我地望住志威靈柩下土。

「志威，好彩可以見返你，但係，估唔到我地兩個相處嘅時間，只有咁短。」望住志威嘅靈柩，心中一陣感觸。

而小段係呢個時候行到我旁邊話：「輝爺，珍妮契老豆臨死前有一樣野要比你。」小段拎左一本野出黎，我望一望，原來係當日志威叫我帶比佢，我嘅校刊。