[年齡無界限] 就係咁，我最近出席好多喪禮: ７６　兩杯藥水

清晨，日出，呢一個係我最唔想見到嘅日出，不過，我無能力阻止。

係志威準備安樂食嘅小屋入面，我地每一個人氣氛都好沉重，醫生同護士係度安排緊一陣志威安樂死要用嘅野。

而我地，只可以睇住呢Ｄ過程，等待最後嘅一刻。

志威訓左係房人面嘅一張床上面，小慧就坐左係旁邊。

「喊……過？」志威望住雙眼通紅嘅小慧，而小慧只係用一個微笑回答佢。





志威伸出震緊嘅手，撫摸住小慧嘅臉，「辛……辛苦……妳……」

小慧微笑地搖一搖頭。

小段係呢個時候，拎左部相機出黎，「不如我地影張合照。」

我地圍坐係志威所訓嘅床邊，「一……二……三……笑。」小段按下快門，笑？我而家只可以強顏歡笑。

志威安樂死嘅時間，距離而家仲有一個鐘頭，醫生同護士入左黎，而且仲有一個翻譯，醫生入左黎後，我地就讓開左位比醫生行近志威，佢握一握志威嘅手，講左幾句後，翻譯就話：「醫生話：『我很榮幸可以認識你，但好遺憾，你需要我所提供嘅服務。』。」





呢一場安樂死，就係呢一句咁有人性嘅說話展開。

護士先拎左一杯藥出黎。

「呢一杯係你今日飲嘅第一杯藥水。」翻譯講完後，護士就喂志威飲左呢一杯藥水。

「你地可以傾下計，等呢一杯藥水藥效發揮。」翻譯話，而珍妮就即刻問：「發揮後契老豆就會……死？」

「唔係。」翻譯不慌不忙話：「要飲第二杯藥水先會死。」佢講到好淡然。





而係呢個時候，志威同小段講：「記……記得……」

「我記得架拿，你放心啦。」唔知志威同小段之間有咩野秘密呢？

「爸，你有無野想講低？」蕎兒話，佢已經落下淚。

而志威望住佢個女，「唔……好……喊……照顧……妳……媽媽……」

蕎兒聽到後，點一點頭。

然後，護士拎左拎另一杯藥水，而翻譯就問志威，「志威先生，係飲呢一杯藥水前，我想確定一次，你確定你要飲呢一杯藥水？飲左之後，你就會訓著，然後死亡。」

志良用堅決嘅眼神聽完翻譯所講嘅野後，點一點頭話：「我……我飲……」

翻譯向醫生同護士點一點頭，護士就將第二杯藥水放到志威面前，正當護士想喂志威飲藥水之際，小慧突然話：「等我黎。」





聽到小慧咁講，講真，我真係嚇左一跳。

「契媽……」早已經喊到收唔到聲嘅珍妮，而及蕎兒都捉住左小慧嘅手，而小慧就話：「志威嘅最後一步，我做老婆嘅一定要支持。」

我望住小慧微抖嘅雙唇，我知道佢而家好想喊，但佢強忍住。

小慧拎起身二杯藥水，一邊喂志威飲，一邊話：「老公，你先去果度，我以後再去搵你。」志威無任何動作，但佢用眼神回應左小慧嘅說話。

飲過藥水後，小慧不停安撫志威，而志威佢一飲完後，有幾下呼吸聲好大，「再……再見……」然後，閉上眼，無左呼吸，睇上黎，志威就好似訓左一樣。