[年齡無界限] 就係咁，我最近出席好多喪禮: ７２　等

望住屋企個鐘，本身而家呢個時間我應該係飛機上面，佢地係上機前都有ＳＤ　ＭＳＧ比我。

小慧就係關心我，當然仲有幫志威問我發生咩野事啦，咁我就緊係無答佢，只係叫佢好好照顧志威。

而珍妮都係一如既往嘅性格，叫我記住快Ｄ黎，佢契老豆係唔會因為佢嘅遲到而選擇唔安樂死……

見到佢呢句ＭＳＧ，都唔知好嬲定好笑。

而小段，就係問我搵返塊金牌未，我答佢舅父處理緊，然後就問佢幫我改機票嘅野。





覆左一輪ＭＳＧ後，又回到平靜，我坐左係度望住個鐘慢慢等銅ＳＩＲ嘅消息，而目光就慢慢投到個高櫃上面嘅鐵罐度。

就係搵到塊金牌嘅鐵罐。

大家仲記唔記得我講過鐵罐入面，仲有兩樣野係我一直都想逃避嘅野，係呢一刻，無啦啦心血來潮又拎左個鐵罐落黎，打開左佢後望住果兩樣野。

一個，係一份仲未拆嘅ＤＮＡ報告。

另一個，係一份保單……





「上次同你講嘅野，你考慮成點？」諗返起上次阿芳問我。

「比我再考慮多陣。」再諗一諗我上次嘅答案。

其實保單上面受益人，我只係寫左龍仔個名，而我而家嘅老婆就想我加埋佢個女個名落去。

我一直都無加，係因為呢個女唔係我親生。

你地聽到我咁，可以話我係一個食古不化嘅老人家，有時我自己睇返自己，都覺得係。





我都唔知咩野原因會令我咁抗拒加個名落去，其實阿芳對我唔係唔好，只係……我都唔知差Ｄ咩……

我拎住份保單靜思緊，其實，我知有Ｄ野真係帶唔走，係我經歷過福伯同蔡老闆嘅喪禮後，更加覺得係。

我係未，應該好好考慮一下加名個問題？

係呢個時候，電話響起，「喂？」我問。

「銅ＳＩＲ啊，你要嘅野搵到。」就係一句簡單嘅回答，我又再度放低左呢兩個事。