[年齡無界限] 就係咁，我最近出席好多喪禮: ６６　要面對的兩件事

「上次果一萬蚊你過左數比我未啊！」又係龍仔。

「過左數啦，你無收到咩？」我問。

「我ＣＨＥＣＫ啊，你過左數同我講聲嘛，係咁啦。」龍仔講完呢句就ＣＵＴ左線。

三句，今次只係講左三句。

對住呢個仔，我就只可以不停咁嘆氣……振作，唔好比呢Ｄ事打斷左自己心中嘅果團火！係咩野火？因為我而家反轉左間屋咁滯，點解？因為我要搵返果一面金牌。





果一面我唯一一次贏左志威嘅水運會全場總冠軍嘅金牌。

我想，係佢臨死前，將呢個金牌送比佢。

我唔知係咩野影響令我心血來潮有呢個想法，我只係想係志威安樂死之前，比一份心意佢，可能，係見到佢個女嘅行為，令我有咁嘅行動。

唔知，志威見到呢一份禮物，會有咩野表情呢？

諗起呢度就更加有動力搵返個金牌出黎，不過……不過……我究竟收埋塊野係邊呢？





之後搵左我成三個幾鐘頭，終於係一個好高嘅衣櫃上面其中一個月餅罐度搵到個牌，唔好問點解我地呢Ｄ老人家點解咁終於貯月餅罐，其實我自己都唔知點解，貯貯下就變左個習慣，又或者可以叫興趣。

就等於而家Ｄ後生鐘意貯公仔一樣。

唔好講咁遠住，講返塊牌先，我一打開個月餅盒，見到個牌果一刻真係成個人都開心晒，但係呢一種感覺只係維持左幾秒，因為我發現塊牌下面，壓住左兩樣我一直都想逃避嘅野……

唔通……個天就係因為想我再面對呢兩樣野，所以先要安排一個咁嘅機會要我搵返個金牌？

我將三樣野同時拎左出黎放左係枱上面，重複我果日同小慧講過嘅一句話：「都咁大年紀，都應該要有一個終結。」





我將塊金牌放左係個袋入面，而果兩樣野，我就放返入個月餅罐度。

完左志威呢一段路後，我就要好好面對果兩樣野。

唔知，聽日志威見到塊金牌會點呢？佢會唔會開心到喊呢？定係會開心到唔知講咩野好呢？不過可能佢都講唔到幾多。

腦入面不停迫自己諗志威見到塊牌嘅情況，因為，其實我仍然好怕面對果兩件事。

我諗今晚嘅我，一定失眠。