[年齡無界限] 就係咁，我最近出席好多喪禮: ６４　樂天又悲觀

就係呢個時候，電話突然響起，係小慧嘅電話，佢接左後講左幾句，由對話聽得出佢係同珍妮講緊電話。

收線後，小慧第一句就講：「呢個傻妹真係。」

「珍妮？」我呢個係明知故問嘅問題。

「係啊，佢而家黎緊，快Ｄ收埋本校刊先。」小慧將兩本校刊放返入環保袋。

「係……如果唔係，佢見到由會迫問我講佢知最後一頁嘅秘密。」我話，而小慧聽到後就笑住和應。





而我，就問左小慧一個問題：「其實，點解珍妮會做左妳契女？」

小慧先將環保袋放好，然後答我：「珍妮，佢係一個樂天但又悲觀嘅女仔。」

「樂天……又悲觀……咁矛盾？」我問。

「你見個傻妹平時好似咩事都唔驚，講野又直接，個人又好似好樂天咁，其實，佢係一個唔怕死嘅人，應該係話，佢係一個覺得自己死左都無所講嘅人。」

「死左都無所謂嘅人？」我一臉疑惑。





「珍妮嘅過去，係一個好老套嘅故事，但係就係呢個過去，令到珍妮佢執著一件事，但其實佢又怕去面對果一件事。」小慧話。

「果件事係件咩野事？」我問，但係當我以為知道珍妮嘅秘密果一刻……

「你地講緊Ｄ咩啊！」無錯啊，珍妮又出現截停左小慧嘅對話。

點解！只係差少少我就知道呢個珍妮嘅秘密！點解上天唔比我知啊！！！

望住面前嘅小慧同珍妮，就如佢小慧所講，珍妮點睇都似一個樂天嘅女仔，但係小慧講佢係樂天帶悲觀，究起係咩野一回事。





而小慧口中果件老套嘅事，又係個點樣老套嘅事？

佢地兩個之後就去左睇志威，而我就準備返去，一出醫院，我打左個電話比小段。

「喂？」唔好介意老人家打電話去比果個人，然後又要講好幾個喂字，我地咁做，係因為我地耳力有Ｄ問題，怕部電話無啦啦無聲係部電話壞左。

而小段聽到我把聲，就一把烚熟狗頭嘅語氣同我講：「你好啊輝爺，咁少何打黎，係未又有生意介紹比我啊。」

「你都痴嘅，我身邊邊有咁多人死啊。」我話。

「唔緊要，遲早都會有嘅。」小段係未跟得珍妮多呢，講野咁摟打嘅。

「係呢輝爺，你搵我咩野事？」小段問。

而我就話：「你覺得，珍妮佢係未一個樂天又悲觀嘅人？」





小段聽到我呢句話後，隔左幾秒後先答我：「睇黎你知道左珍妮多少少野。」

「嗯。」我話：「但我知道你知得仲多過我，講Ｄ我聽。」

「輝爺，都係果句啦，如果珍妮想比你知，總有一日會講你知，而且我答應左珍妮佢守秘密，所以我唔可以話你知。」小段話。

「咁好啦。」我答，然後就收左線。

如果珍妮想話我知，總有一日會講我知，唔知，我有無呢一日嘅機會。