[年齡無界限] 就係咁，我最近出席好多喪禮: ６３　如果……如果……

係呢幾日，我都有抽空去搵志威，大多數都係講我地以前嘅事，佢有好幾次都想提返起果件事，以及又再同我講對唔住，但係我總係轉話題。

因為，其實要講對唔住果個人，係我。

「你……可……唔……可以……留……你……本……校……刊……比……我……」志威用一個懇求嘅眼神望住我。

「留比你有咩用？」我問。

「唔……唔該……你啦……」其實我都只係問下，我又點會拒絕而家志威嘅要求。





於是我另一日就帶左本校刊返去比佢。

可能，我同佢最多嘅回憶就係讀書時期，佢想好好回憶一番掛。

「阿輝，你今日又黎左啊？」當我剛剛離開房門嘅時候，就見到小慧。

「係啊，志威佢訓左，我都唔嘈佢，比佢休息下。」我答小慧。

小慧微笑左一下，望一望房門，然後又望返我話：「不如我地去食Ｄ野。」





「好。」我回答。

今日嘅小慧同平時嘅小慧一樣，佢都會帶一個環保袋，戴住果一條手鏈，但今日見到個環保袋形狀，比以往有小小唔同，好似裝住左本書。

係醫院嘅飯堂，我地只係叫左Ｄ小食同野飲，「志威係未叫你留低本校刊比佢啊？」小慧問。

「係啊，我今日拎左黎比佢。」我答。

然後，小慧係環保袋入面拎左兩本同式樣嘅校刊出黎，「志威都有叫我拎我同佢嘅校刊黎比佢。」佢將兩本校刊放左係枱上面。





而我，望住呢兩本校刊，就話：「果一日，對唔住。」

小慧聽到我講對唔住後，微笑咁話：「傻啦，你都係將你想講嘅野講出黎姐。」

「但係，我咁樣做好似令到志威佢以為……以為對我唔住。」我話。

小慧繼續微笑，「都係架，佢每一年都會拎返呢本校刊出黎睇，每次睇到最後一頁，佢都會同我講：『如果妳當日唔係黎搵我，可能我地三個到今日都仲係好朋友。』。」

我小慧口中聽到志威所想後，又一種難以形容嘅感覺，「呢個世界點會有如果ＷＯ，可能，妳當日去搵佢，先係最好嘅選擇。」

「點解呢？」小慧不解咁問。

「因為我見到而家嘅妳，好幸福，我見到妳每次臉上嘅微笑，都感覺到係打從心底笑出黎，妳當日去見佢，可能先會有今日嘅幸福。」我講完後，望一望當年我係小慧校刊最後一頁所加嘅字，「講真，當年仲細唔識諗，總係覺得點解永遠都企係志威嘅後面，無論學業同運動，我都唔及佢，點解連愛情都要係咁，不過，到而家望返轉頭，我就知道其實就算點比都好，我輸嘅唔會學業運動，而係自信。」

小慧聽到我所講嘅說話後，失笑起來，「大家都咁大年紀，仲講呢Ｄ野做咩呢。」





我嘆左口氣，「係，都咁大年紀，都應該要有一個終結。」