[年齡無界限] 就係咁，我最近出席好多喪禮: ５８　志威

企係我前面嘅小慧開門，「老公，你睇下我今日帶左邊個黎。」係我眼前嘅小慧仍然阻住我嘅視線，我睇唔到志威而家係點樣，但係聽到佢把聲，「……邊……邊個……啊？」

佢聲線，好似講句野都好難咁。

「你估下啦契老豆。」珍妮話。

而係我前面嘅小慧，慢慢行到床邊，我嘅視線終於可以睇到病床，仲見到訓係床上面嘅志威，佢睇黎好正常咁訓左係床上面。

點解我話睇黎好正常，因為佢身上面好似無咩包紮，但係佢身體嘅動作，就好似一個小兒麻痺症咁。





「……你……你係……」佢講句野，都會流晒口水出黎咁，而小慧就係旁邊，不斷用紙巾幫佢擦。

我望住佢，一句話都講唔到，以前四肢健全，品學兼優，運動又勁嘅志威，點解會變成咁？

「……阿輝？」志威好辛苦先講得出呢兩個字，但係，我都唔知比Ｄ咩野反應佢。

小慧見到我無咩反應，就幫我打圓場話：「係啊，你真係叻，佢係阿輝啊，讀書果陣你地兩個好好朋友架。」

突然間，心口好似有一道力好大力咁壓住，壓到好似透唔到氣。





「輝爺，就咩呆左咁企係度啊，老朋友見面，快Ｄ坐過黎傾下計啦。」珍妮講完後，企係我身邊嘅小段就推一推我，「輝爺，我地過去啦。」

再近Ｄ睇志威，真係估唔到佢而家變成咁，係我腦入面不停彈出嘅係好多問題，係因為老人病整到佢咁？係因為出左事故整到佢咁？究竟點解佢會變成咁？

「點解你會……搞成咁？」我問左出黎後，先知道自己將自己嘅心聲都講埋出口。

珍妮聽到反左下白眼，小段聽到好尷尬咁笑，小慧聽到則係仍然微笑住，而志威聽到，佢笑左一下話：「……硬……硬頸……囉。」

「硬頸？」我問。





「係啊，佢好硬頸架。」小慧笑住話，然後扶起左志威，「幫你刷下身先。」

小慧一路幫志威刷身，而志威就一路同我而一個又一個單字傾計，「我……地……幾……十……年……」「係啊，我地幾十年無見拿。」

「你……過……成……」「我過得幾好啊，而家退左休，生活都過得去。」

「又……會……撞……返……」「係囉，係果次珍妮帶我返教會，然後就撞返小慧。」

「點……識……」「我同珍妮識得好特別，係一個喪禮度識架。」

因為志威係用單字講野，所以我大概都估到佢講Ｄ咩，佢未講完已經可以答到佢嘅問題。

志威聽到我話係喪禮度識珍妮後，就望住珍妮話：「妳……仲……一……」「係啊，契老豆。」

志威問完珍妮呢個問題後，又望住我，然後講左三個令我好動容嘅字，「對……唔……住……」





呢三個字，可能在場嘅其餘三個人都唔會知志威係為左Ｄ咩而同我講，但係，我知道佢呢三個字，係為左當年嘅一件事而同我講。

我望住志威，握住佢隻手話：「傻啦，咁耐嘅野，我都已經唔記得。」

只見到志威用一個好感激嘅眼望住我，就有少少熱淚盈眶咁話：「我……無……諗過……」「得拿，我知道你想講咩。」