[年齡無界限] 就係咁，我最近出席好多喪禮: ５７　安樂死

係一個私家醫院嘅地下大堂入面，我心入面好忐忑，因為一陣入去見嘅，係我無見好幾十年嘅朋友，一位我絕左交到而家都無見過嘅朋友。

我應該用咩野心態去見佢呢？

係，雖然我年紀都已經咁大，都有好多人生歷練，都知道一陣見到呢一位朋友都係一個化干戈為玉帛嘅情境。

不過，係會講Ｄ咩架呢？

「輝爺，你好似好緊張咁ＷＯ。」坐係我旁邊嘅小段話。





無錯，佢又係度，我今早一黎到大堂就見到佢，下意識一見到佢我就問佢係未黎呢度搵生意，佢答我係，不過最主要嘅目的，係因為珍妮契老豆。

原來，珍妮介紹左佢契老豆個喪禮比小段處理。

「你係幾時知呢件事？」我問小段，我指果件事，係志威安樂死嘅事。

「已經係好耐之前嘅事。」小段話：「本身我都唔想接呢個ＣＡＳＥ，不過珍妮成日出席唔同喪禮，熟左之後成為朋友，佢叫到唔通唔幫咩。」

「有生意你會唔做？」我笑住咁講，而小段就話：「你知唔知香港安樂死係未立法架，所以有可能會犯法架。」





「下！？犯法架？咁你都接？」我問。

「咁呢個世上唔只香港一個地方嘅，係瑞士係可以合法安樂死。」小段話：「我本身唔接，係因為如果要幫珍妮佢契老豆，就要飛過去瑞士搞，而且過程都好煩。」

「原來係咁。」我聽完小段講嘅野後，又問佢：「咁你一定知道佢契老豆點解要安樂死啦。」

「都知少少啦。」小段話：「本身聽到佢契老豆話想安樂死，都嚇左一跳，但係當你知道左佢嘅經歷後，你就會覺得，佢契老豆係一個好合適選擇安樂死嘅人。」

「係咩野經歷啊？」我問。





「係……」「喂！你地係度講Ｄ咩野啊？」就係小段正想講志威點解要安樂死，珍妮突然從後好大力咁踢左小段一下。

小段當然係成個人向前仆啦，「小姐……呢度醫院黎架，妳可唔可以正常Ｄ啊……」

我望一望珍妮，見到佢傻笑咁望住我地，而係佢身後，係小慧，「珍妮，正經Ｄ啊。」

「知道。」珍妮好聽話咁行到小慧嘅身後。

「早晨。」小慧，仍然係果一個微笑。

我同小段回應左佢後，就跟住佢地嘅身後行，「快Ｄ講我知啦……」我好細聲咁同小段講。

「……你一陣見到未知囉。」小段都好細聲咁答我。

「雖然呢度係醫院，講野要細聲Ｄ，但又唔駛咁細聲嘅。」珍妮轉頭同我地兩個講，唔知點解，佢眼神有一種望住傻仔嘅感覺。





過左一陣，我地就行到一個病房門前，志威就係入面，我同佢只係一門之隔。