[年齡無界限] 就係咁，我最近出席好多喪禮: ５９　最有資格的人

今日黎醫院，係為左志威要去瑞士前做一次檢查，係走廊度，我、小段同珍妮坐左係房外，而房內嘅，係小慧同志威。

「點解妳契老豆要安樂死？」我問珍妮。

「說來話長，你係未有時間聽？」珍妮用一個好淡然嘅語氣話。

「妳講啦。」我話。

「講契老豆點解要安樂死前，就要講佢幾年前嘅事。」珍妮話：「你聽完後，就會覺得契老豆係一個最有資格選擇安樂死嘅人。」





點解佢呢一句同頭先小段講嘅咁似樣。

珍妮望一望房入面，正在同醫生傾緊野嘅小慧同志威，「你知唔知，以前契老豆好勁架，佢係一個大學教授，桃李滿門，我都有偷偷地上過佢嘅堂，佢上堂果陣係一個好有威嚴嘅人，就好似係課室入面佢就係主一樣，無人能及。」

「但係，四年前，契老豆佢確診患左腸癌，第三期，果陣我地聽到都不知幾震驚，我更加突然唔知點算好，因為契老豆將要面對嘅，係死神，佢可以選擇嘅，係同死神駁鬥，定係等待死神來臨，如果要駁鬥嘅話，佢就要做化療食標靶藥。」

「果陣我地都傾左，因為契老豆都已經一把年紀，如果佢仲要做化療同食標靶藥嘅話，我同契媽都驚佢捱唔住，但係契老豆就話如果未到末期，佢點都會選擇駁鬥，所以佢同醫生講決定要做化療，食標靶藥，要做一個抗癌勇士，就係因為佢硬頸，所以佢要同死神鬥過。」

原來頭先小慧話佢硬頸，就係咁樣，「咁之後呢？」





「兩年後，契老豆嘅硬頸終於有回報，佢真係打贏左死神，做左一個抗癌勇士，但係換來嘅就係好多嘅後遺症，令到佢行動不便，講野漏風同有障礙，成個人好似小兒麻痺症咁，我見到契老豆咁，都唔知應該替佢開心定點，不過契媽就話：『老公，只要係你選擇要活落黎，我點都會陪你。』，果陣我真係覺得，上天點解要對佢地開一個咁大嘅玩笑。」

「然後，又過左一年，契老豆已經無法好似以前咁樣生活，佢唔可以好似以前咁教人，生活上大大少少都要契媽睇住，有一日我去睇佢，我見到佢呆住左望住個窗口，果陣我問佢睇咩，佢竟然話如由窗口跌落地，唔知要幾耐，果一刻我就知道，契老豆嘅心境已經轉變，而直到果一日，我仲好記得果一日，我同契媽都在場，就係我地幫佢打掃嘅時候，佢用單字同我地講：『我……想……安……樂……死……』，就係呢五個字，我同契媽都停晒手頭上做緊嘅野，行到契老豆嘅面前……」

『點得架契老豆，你好辛苦先打贏死神，而家點可以……』

『就……算……死……我……都……要……』『就算死你都要係自己選擇，係未啊，老公？』

「我果陣聽到契媽同契老豆嘅對話，真係呆晒，我只見到契老豆果陣，用一個好感激但帶住悔疚嘅眼神望住契媽，而契媽就用一個明白恩惠但又不捨嘅眼神望住契老豆微笑，果一刻我就意識到，契老豆求死嘅決心，而及契媽不捨嘅回答，佢接受左契老豆嘅要求。」





聽完珍妮講志威點解要安樂死後，我望住房內嘅佢，當年佢有勇氣同死神駁鬥，如今，更有勇氣自己選擇面對死神。

可能有人會覺得，點解咁蠢已經係死神手中挑走左出黎，而家又中個頭返去死神手中，但係諗深一層……

我終於明白點解小段同珍妮會話志威係一個有資格選擇安樂死嘅人，因為，佢曾經為自己生命拼駁過，如果佢要死嘅話，都要自己選擇死嘅方法。