[年齡無界限] 就係咁，我最近出席好多喪禮: ５６　提前的死訊

係教會入面，小慧坐係我旁邊，而我，唔知邊度黎嘅尷尬心態，唔知講Ｄ咩野好，而小慧佢見左珍妮去幫我地買野飲。

「珍妮個傻妹係未好得意？」小慧問。

「……係啊。」我答。

「不過佢講野成日唔經大腦，成日搞出好多笑話。」小慧又話。

「咁佢講野又真係好直接。」我好認同佢呢個講法，小慧見到我咁認同，都笑左出黎話：「睇黎你都受過佢直接嘅威力。」





我尷尬咁笑左幾聲話：「……都係架。」

講左一陣野，終於無咁尷尬。

「係呢，志威佢……最近點啊？」我問，我口中所講嘅志威，就係當年我嘅好朋友，但又係我唯一一個絕左交嘅好朋友。

因為……

「佢算係幾好。」小慧好黯然咁講，剛才微笑嘅臉都失色左好多。





呢一位好朋友，就係當年同我爭小慧嘅人。

就係呢個時候，珍妮買左兩支野飲返黎，「契媽，我買左返黎拿。」佢快步咁走左去小慧旁邊坐住，然後話：「你地頭先傾左Ｄ咩啊。」

其實頭先同小慧傾計嘅內容，我真係無咩點留意，因為一見返佢，所有回憶都突然擁現。

「頭先我問阿輝，妳有無比麻煩佢。」小慧微笑話。

「我緊係無啦，我仲幫佢朋友同埋佢個仔搵工做添啊。」珍妮話。





「妳無麻煩到人就得拿。」小慧輕拍左珍妮個頭一下。

「係呢……你又會收左個契女嘅？」我問小慧。

「因為我係一個孤兒囉。」珍妮呢個回答，係笑住答我，而我，就有一種覺得問錯野嘅感覺，「……唔好意思。」

「唔緊要啦，我已經習慣左架拿。」珍妮，睇黎佢背後一定有好多秘密。

「係呢，契媽啊，妳識得輝爺，咁契老豆係未都識得佢架？」珍妮問小慧。

而小慧，繼續頭先一樣嘅微笑，不過總覺得，微笑突然有少少失色，「佢地識得架，而且……以前仲係好好朋友添。」

係，係讀書嘅時期，我同志威係好朋友，但係因為少不更事唔識諗，為左小慧嘅野，我同佢絕左交，一絕就絕到而家。

「呢個世界真係細，咁如果輝爺識得契老豆，就要係契老豆死之前比佢地見一見拿。」珍妮呢句說話，我覺得好奇怪。





「……等等，咩野死之前？」我問小慧：「志威佢唔係有Ｄ咩野事掛？」

而小慧，都係果一抹微笑，「佢選擇過左我生日嘅一個月後，安樂死。」

「下！？」我驚訝地望住小慧同珍妮，「安樂死！？」