[年齡無界限] 就係咁，我最近出席好多喪禮: ５５　初戀情人

「多謝呢位弟兄嘅分享。」我理得而家分享Ｄ咩，原來我上次無聽錯，果個人真係小慧。

行動快過思想，我向住小慧嘅方向行過去，而小慧好似見到我嘅行動，開始諗緊我係邊個，但係……

「契媽！」珍妮嘅身影閃出，佢衝左去小慧嘅身邊，好用力咁攬住左佢。

我繼續慢慢行近小慧。

「契媽點解妳今日要黎唔話我知嘅？」珍妮好少有咁天真。





「比妳知道又煩住晒架拿。」小慧答佢。

一陣行到去小慧嘅面前，要講Ｄ咩好呢？

「契媽厭我煩……」「點會呢。」小慧嘅微笑，真係令人刻骨銘心。

唔知小慧記唔記得我係邊個呢？

直到，我行到小慧同珍妮嘅面前，「我……」





「契媽！等我黎介紹，呢一位係我新識嘅朋友，佢叫輝爺，佢對主有好濃厚嘅興趣架。」等等，我幾時對主有濃厚嘅興趣。

而小慧，佢微笑望住我，「好耐無見。」

估唔到，同佢見返面，會係佢先開口。

「係啊……真係好耐無見。」我答佢。

「……你地，識架咩？」珍妮問緊小慧。





小慧摸一摸珍妮個頭後話：「我同阿輝，讀中學果陣已經識架拿。」

小慧，係我嘅初戀情人，但就似我先前講嘅一樣，呢一個諗法係我單方面嘅想法，因為正確黎講，我果陣只係單戀。

珍妮聽到小慧嘅說話好，靈出好驚訝嘅眼神，「竟然係咁！？呢個世界真係細啊……」

而小慧，佢仍然微笑緊話：「係啊，呢個世界真係好細。」

無錯，真係估唔到珍妮有個契媽，而且佢契媽就係我當年求學時期鐘意嘅人。