[年齡無界限] 就係咁，我最近出席好多喪禮: ５３　阿芳

呢位南亞裔青年又上車嘅一刻，已經望左我好耐，而我亦都不甘視弱望返佢，「你望夠未啊！」佢大喝左我一句，而我就回應一句：「你唔望我又點知我望你啊。」

講真，佢大喝果下我個心真係離一離。

我究竟得罪左佢Ｄ咩野呢？點解佢硬係要針對我？

而紅ＶＡＮ嘅可能驚我地初而口角，繼而動武，所以好快就叫我地唔好搞事，以及，趕左我同佢落車……

點解呢……點解要連我都被趕落車……





個司機唔諗下我呢Ｄ阿伯嘅危險架？一齊款趕我地落車，唔怕我比呢位南亞裔青年打咩？

「真係黑仔！」個南亞裔青年不忿氣講左一句，而我就望一望佢，佢又好似成個人著晒火話：「你望咩撚野啊！想話我本身就好黑！所以黑仔係應該啊！」

呢個青年真係痴撚線架ＷＯ，我咩都無講過佢就可以諗咁多未發生過嘅野出黎。

佢勢兇夾狼咁行緊我身邊……死火，我自問後生果陣都幾好打，但而家已經係阿伯，我點會有反擊力呢？

唔通今次真係要幫襯小段！？





「前面發生咩野事！」好彩，咁岩有兩個差佬經過。

「阿伯，今次算你好彩。」個南亞裔青年講左句後，就急咁腳跑開左。

其中一位差佬就跑左去追，而另一位就留左係度問我：「阿伯，發生咩野事？」

我望住已經遠去嘅南亞裔青年，就話：「無野……」

定一定神後，就坐左另一架紅ＶＡＮ返屋企，一返到樓下，就見到一個都幾耐無見嘅女人，而我同呢個女人擦身而過，但呢個女人就跟住我身後面。





呢個人拎住一袋二袋野，係我身後面行到喘晒氣。

「輝爺，今日咁好個女黎探你啊？」樓下嘅看更永遠都係最八嘅果一個。

無錯，跟住我身後面呢個女人，算係我個女，係我老婆同前任老公生嘅女。

升到升降機，得我地兩個。

「佢叫妳黎架？」我問，我口中嘅佢，係我老婆。

「嗯。」我個女點一點頭，「阿媽話就轉天氣，叫我過黎幫你執下野，順便幫你Ｄ衫換一換季。」

我同呢個女，不嬲都好少野講，通常都係對答問題。

「最近過成點？」佢問。





「幾好。」我答佢。

「咁……你嬲完未？」佢又問，但我無答佢。

升降機門開，去到我屋企門前，「你知唔知阿媽好擔心你一個人出黎自己住架，佢話你自己一個人都唔知照唔照顧到自己，衰Ｄ講句，真係死左我地都唔知。」佢用好平和嘅語氣講，同佢第一次講呢句說話時嘅語氣，真係差天共地。

不過今次，同以往唔同，「……我知，」因為我以往唔會答佢呢個問題，但今次，可能經歷過福伯同蔡老闆嘅死，心境唔同左，「我知佢擔心我。」

我個女，叫阿芳。

「上次同你講嘅野，你考慮成點？」阿芳問我。

「比我再考慮多陣。」我話。