[年齡無界限] 就係咁，我最近出席好多喪禮: ５２　紅ＶＡＮ上又再相遇

「我有Ｄ急事要用錢，過一萬比我。」聽完呢一句話，龍仔就ＣＵＴ左線。

年中我都收唔少佢呢Ｄ電話，一句說話就要我為佢做Ｄ野，雖然口中不停鬧佢，但係都係過唔到自己心入面果關。

最後都係過左一萬比佢。

「唉……」無聲嘆氣嘅我，「做咩事咁樣啊，輝爺？」問呢句野果個係小段，今日同佢處理好蔡老闆骨灰嘅過關文件後，同佢食緊晏就，同行嘅，仲有珍妮。

「仲駛問，睇佢咁嘅款就緊係關佢個不肖子事啦。」直接嘅珍妮依然直接。





「妳唔出聲無人話妳啞架。」小段好尷尬咁同珍妮話。

「我唔講野會死架。」珍妮反擊。

望住佢地兩個人吵，其實都幾好笑。

「其實珍妮都講得岩嘅。」我認同珍妮嘅說話：「但我又可以點，佢始終係我個仔，我唔幫佢嘅話，就無人會幫佢。」

珍妮聽到我咁講後，好刻意咁嘆左啖氣，而小段就打左佢一下後同我講：「我明架，輝爺。」





「係拿，我個朋友阿然有無搵你？」我問小段。

「有啊，佢兩個星期前打比我話想傾身後事嘅野，真係多謝晒你嘅介紹啊。」佢又笑到好烚熟狗頭，然後又突然好正經且婉轉地話：「不過呢……就係呢……我地呢一行唔會有呢……介紹費……」

「明嘅明嘅，我都唔會在意果Ｄ錢。」聽到我咁答嘅小段，當堂鬆一口氣，「得你咁深明大意就最好拿。」

「守財奴。」珍妮又開始發動攻擊。

「我認我係啊，點啊。」小段嘅反擊。





「理你都有味，係拿輝爺，你果陣話有時間嘅話會黎我嘅教會，咁係幾時姐？」「妳又叫人去教會？」佢地一唱一和，我係旁邊真係睇到唔想出聲剩食花生。

「我過兩日得閒，到時再話妳知。」我答珍妮。

「好啊，一言為定。」珍妮回答。

食完野後，我地就準備各散東西，「我去搭紅ＶＡＮ啊，係咁先。」我同佢地兩個講。

「咩呢度有紅ＶＡＮ架咩？」珍妮突然咁問。

「唔係啊，係我地對面未係囉。」我指一指我地對面嘅馬路，「妳唔係咁都睇唔到掛。」

「……睇到。」珍妮答，佢呢一下答得有Ｄ奇怪，而小段就接住話：「咁好啦，再見拿輝爺。

同佢地道別左後，我行到紅ＶＡＮ站等小巴，好快就上左車，但點知一上到車坐左陣，又見到果一晚果位向我舉中指嘅南亞裔青年。