[年齡無界限] 就係咁，我最近出席好多喪禮: ４６　蔡老闆的喪禮

第二朝早，好早就起左身，應該係話，根本成晚都訓唔著，望天光。

我地亦都好早就出發返香港，一到步我地就即刻安排認屍，而小段都在場，仲有一個唔係幾關事嘅珍妮。

小段同蔡老闆前妻以及佢個仔交待左後事可以點處理後，佢地都好放心將呢件事交比小段負責，而過多半個月，蔡老闆就設靈。

其實我都無諗過件事可以咁順利，一開初知道左蔡老闆同佢前妻嘅事，我反應係覺得佢前妻嘅錯，到後來聽到蔡老闆所講後，我就覺得自己咁大個人都可以只聽片面之詞就決定一件事，到最後蔡老闆走左後，見到佢前妻知道所有嘅野……

只係覺得，人原來有好多野都唔係自己控制到，有時仲要自以為所想嘅計劃只要跟住行就可以，其實有好多外來因素會改變自己想要嘅結果。





當初蔡老闆前妻本來想解決好生活上嘅野就搵返蔡老闆，但估唔到，最後只可以等到我地報喪。

係靈堂入面，小段拎住左兩套喪服，「你地換左衫先。」而佢地兩個接過喪服後，就去左換衫。

珍妮去左幫蔡老闆前妻換，而佢個仔就自己行去埋一角換，係呢個時候我就問阿然，「小段啊，其實佢地已經離左婚，駛唔駛披麻帶孝？」

而小段就話：「其實呢Ｄ只係儀式上嘅野，只要果個人有心，披麻帶孝只係形而上嘅事。」

我地幾個聽到小段呢一句說話，真心唔明佢講咩，「係未佢見慣先會咁講呢？」阿然問我。





「係掛。」我答。

而小段見到蔡老闆個仔就快著好衫，就行去幫佢披麻帶孝，等小段幫完手後，蔡老闆個仔就同小段講左一句：「多謝你。」

小段聽到蔡老闆個仔講左呢一句後，微笑左一下同佢講：「今日講埋呢次好拿，喪禮上面好少人講多謝，要講有心。」

蔡老闆個仔聽到後，點一點頭，然後就行去佢阿媽度。

「點解講有心嘅？」行左埋小段旁邊嘅我問佢。





「因為有人走左唔係一件值得開心嘅事，所以我地會用有心代替多謝人。」小段講完後，就拎左個電話出黎打左通電話：「師父你地到未啊？」

我同阿然企係佢面前聽佢講完呢一通電話，等佢講完我就問佢：「你師父黎？」

小段又微笑左一下話：「唔係，係一陣破地獄嘅師父。」

「破地獄！？」我同阿然聽到小段咁講後，唔知點解都用左一個好期待嘅語氣講左呢三個字，雖然我知道唔應該咁，但我真係唔知點解一聽到呢三個字會有呢一個反應。