[年齡無界限] 就係咁，我最近出席好多喪禮: ４５　父子

因為我地無預到件事可以點完結，無買到回程嘅車票，所以係佢地屋企留左一晚，而蔡老闆個仔亦都好快係當晚托朋友要到車票，第二朝早就可以起行。

其實當身邊有個人離開，果種心情雖然傷心，但人始終都要生活，所以有好多野都同平常嘅作息一樣。

只不過，個心好似少左一塊一樣，心疼但感覺不至於痛不欲生。

「輝叔。」係蔡老闆個仔叫我，我轉身望住佢，然後問：「仲記得我ＷＯ。」

「緊係啦，細個果陣阿爸已經成日同我講佢同你點樣一齊為事業奮鬥嘅野我聽，我點會唔記得啊。」蔡老闆個仔講完，行到我旁邊，陪我望住窗外嘅境色。





而我就問佢：「你年紀都唔細，有無置返頭家啊。」

而蔡老闆個仔，好落寞咁笑左一笑話：「無啊，唔敢。」

「唔敢？」聽到佢咁講後，我問。

而佢，又係一下落寞嘅笑容，「唔知係未怕左呢？我驚發生同阿爸一樣嘅結局。」好黯然嘅一句話，睇黎當年蔡老闆同佢前妻影響得佢都幾深。

「我成日都係度諗，其實當年如果阿爸唔係只顧住做野，阿媽係未就唔會發生果Ｄ事？所以，大過左之後某程度上都有少少憎阿爸，不過當我知道阿媽做嘅事後，又覺得點解佢咁一廂情願地做果一個決定又唔同阿爸商量一下，可能，其實阿爸唔會介意，到最後，知道佢地其實為左雙方，暗地裡都等緊大家，為左大家做左Ｄ野又唔比人知，究竟，一個人要去到幾傻，先會覺得自己做緊嘅蠢事係正確？」佢長嘆左一口氣，然後答左自己所問嘅問題：「一個字，愛。」





我認同地點一點頭。

「就係因為咁，所以你唔敢？」我問佢。

而佢，點一點頭，「我驚我自己做唔出好似佢地對愛情嘅犧牲，好想否定佢地呢一個做法，但又好佩服佢地呢一種做法，所以，我搵唔到自己應該要點樣去愛一個人。」

其實，係我眼前蔡老闆個仔，我覺得佢唔係搵唔到自己應該點樣去愛一個人，而係佢從細已經面對咁多事，令到佢只想好好保護自己。

我拍一拍佢膀頭，「你仲有時間，唔似我。」我突然感慨起來。





而佢望一望我，笑住話：「你剛剛先話我年紀唔細，點會仲有時間。」

「但你嘅時間一定比我多。」我話，然後問佢：「咁你仲憎唔憎你阿爸？」

「人都走左，仲有咩野好憎，而且，佢點都係我阿爸，我點都係佢個仔，呢一個關係由出世就定左係咁，父子嘅野，點憎都好都唔會憎一世。」蔡老闆個仔，真你好識諗。