[年齡無界限] 就係咁，我最近出席好多喪禮: ４７　破地獄

蔡老闆無咩親人朋友，所以黎嘅人都只係得小貓三四隻……可以話基本上係無，我地幾個坐係靈堂入面，折緊金元寶。

「有客到，請留步。」聽到呢一句話後，我地望向門口，見到嘅係細路祥，因為佢今日要返公司整蔡老闆保險嘅野，所以朝早無同我地一整黎。

鞠過躬，上過香，細路祥坐左過阿然旁邊，「搞好拿？」阿然問，而細路祥就點一點頭，「等過左喪禮先再同佢地講啦。」阿然又話，而細路祥都係點一點頭。

小段就係呢個時候行左過黎同細路祥自我介紹，當然珍妮都係一樣。

不過呢Ｄ唔係我最在意，我最在意嘅，係旁邊果Ｄ唔知應該叫喃嘸佬定係師父嘅人，佢地不停口嗡嗡，講一Ｄ有時聽得明，有時又聽唔明嘅野。





知佢地係念緊經，但唔知佢係念緊咩野經，可以話佢地專業，但聽佢地又講得好ＨＥＡ。

直到呢班人擺左個陣，有幾塊瓦片，一個火盆，阿然見到咁嘅陣像，就望向我問：「係未開始拿？」

我只係用一個唔知嘅眼神望住佢，然後問小段，「破地獄？」

小段點一點頭，而我又問佢：「點解上次我去福伯嘅喪禮唔駛，但係蔡老闆又有要嘅，係未你地唔同嘅計劃有唔同儀式架？」

小段聽到我嘅問題後，搖一搖頭同我講：「唔關計劃嘅事，而係死於非命嘅人，行道教儀式嘅都會有破地獄儀式。」





「死於非命？」我問。

「相傳死於非命，不得善終者，怕佢地死後係地獄下面搵到路，就要破地獄幫佢地帶路，等佢地可以盡早再入輪迴投胎，所以上次福伯嘅喪體係笑喪，唔駛破地獄，但蔡伯伯佢死於意外，所以就要做。」小段解釋得頭頭是道。

「估唔到你呢位後生仔都識幾多野ＷＯ。」阿然話。

「咁我地做得呢一行，唔多唔少都要知呢Ｄ野。」小段講完後，我地所有人都繼續睇住Ｄ師父不停係到走黎走去。

講真，雖然破地獄好多人都覺得係喪禮終嘅餘慶節目，但係當喪禮嘅主角係你至親嘅人果陣，可能，你唔會有呢一種想法。





因為，我睇得出蔡老闆前妻前佢個仔都好專心咁化寶，聽住Ｄ師父嘅講法做，就算望住其他人都話會睇到差Ｄ拍手掌嘅破地獄，佢地臉上面都只係掛住悲痛嘅思念。

火光熊熊，但係淚影蹤蹤。