[年齡無界限] 就係咁，我最近出席好多喪禮: ４４　執野

無！？無再婚！？我同阿然對望再一眼，兩個都係好疑惑嘅目光。

但係佢前妻就話：「當年離佢而去，係因為我唔想再因為我同家人嘅債務煩到佢，所以先作左個故仔話有人會幫我同家人還債，而條件係我要嫁比佢，果陣佢答應左我，本來我想留阿仔係佢身邊，但佢話唔好，個仔跟住我，有個有能力照顧佢嘅爸爸會好Ｄ，我聽到佢咁講後，本來唔想再呃佢，但當我又諗到，如果唔呃佢，就要負責果Ｄ債務，所以我忍落去都要呃佢。」

阿然聽到後，又問：「咁妳嘅債務最後點？」

「我地變賣晒自己嘅家產，再叫親戚幫手，先叫剛剛好還得晒，但係所有野都無晒，欠落好多人嘅人情債。」佢前妻話：「所以我同我家人都好努力咁搵野做，希望好快就可以回復以前嘅生活，之後就可以再搵返佢，不過我地一直嘅努力，都追唔過時間。」佢前妻黯然咁話。

「但係，我搵過人查妳，果Ｄ人無講我知嘅？」阿然呢個時候問。





「因為我比左錢佢地，叫佢地講令一個版本你知。」一直阿然都以為知道事情嘅全部，原來，一直都只係一知半解。

有一句話，叫做旁觀者清，當局者迷，但係今次正好相反，我同阿然呢Ｄ旁觀者一直以為知道所有，但原來知道所有嘅人，係蔡老闆同佢前妻。

講講下，蔡老闆前妻拎左一個罐出黎，個罐都幾重下，「呢幾十年，我一直貯低諗住比佢。」打開個罐，原來入面裝住左十幾個金粒，「仲諗住貯多幾粒，就可以還返晒以前我欠佢嘅野，然後再同佢一齊，但估唔到佢都咁做，只不過，佢嘅方法係想還返比我，但唔想見到我。」佢拎住份保單，係蔡老闆個簽名上面摸左幾下，「你咁樣貯錢比我地，但係要你死左之後我先有得拎，無左你，咁樣我拎黎仲有咩意思。」

佢將保單放係枱上面，然後將罐入面嘅金粒逐粒放係蔡老闆簽名嘅旁邊，一路放，一路喊，直到將所有金粒都放晒出黎後，佢就話：「我同你都一樣咁傻。」

愛一個人真係可以去到傻呢一種地步，但呢一種傻，係建立係犧牲同付出上面，果Ｄ付出唔單單指物質上，而係時間。





佢地兩人對愛嘅犧牲，亦都係一樣，係將自己對方嘅愛所犧牲，如果捨係情之極致，佢地兩個為左大家，都先捨棄左對對方嘅愛，真係要去到好愛，先會做得出呢件事。

只係，佢地得唔到應有嘅結局。

再過多左陣，蔡老闆個仔返左黎，佢一入門見到咁多人係度，都知道發生左事，蔡老闆前妻行到佢面前攬住佢講，「你爸爸走左拿。」

而佢個仔聽到呢句後，同疑問嘅眼神望住我地，呢一個疑問係問我地佢阿媽講嘅野係唔係真。

而我同阿然就對住佢點一點頭，然後，佢就同佢阿媽講：「執Ｄ野，我地要去送阿爸最後一程。」