[年齡無界限] 就係咁，我最近出席好多喪禮: ３８　帶蔡老闆見工

兩日後，珍妮ＳＤ左個ＭＳＧ比我，話有一份做洗碗嘅工搵緊人，問我嘅朋友有無興趣，聽到呢個消息，我緊係第一時間去搵蔡老闆啦。

而蔡老闆聽到呢個消息後，呆左望住我，「你……你講多次？」

「我話，我托左個朋友幫你搵到份餐廳洗碗嘅工比你，我唔知果邊環境係點架，不過你未當有多個搵錢嘅機會囉。」我一邊講，我面前嘅蔡老闆熱淚盈眶咁望住我話：「多謝！多謝！多謝你啊阿輝！！！」

「男人老狗喊咩野ＷＯ，如果你ＯＫ嘅話，我而家同你去見工。」我同喊緊嘅佢講。

「見……見工，駛唔駛著得好Ｄ啊？」佢問我。





「傻啦，而家見洗碗咋，有著衫去就得架拿。」我講完後佢淚中帶笑。

如果直接比錢蔡老闆，佢唔會要，但係如果幫佢搵工，以佢自己勞力賺返嚟嘅錢，呢一種幫手方法，就可以令到佢保住自己嘅尊嚴。

去到果間餐廳，係一間好普通嘅茶餐廳嚟，都幾大下，不過人就好少，可能未係高峰期掛，而且呢個地方，距離蔡老闆所住嘅地方好近，所以佢返工可以行路就得，車錢都可以慳返。

入到去，蔡老闆同我講：「見工我自己一個人就得架拿，你去旁邊食住野等我啦。」

「咁你一陣同老闆講，係一個叫珍妮嘅女仔介紹啊。」我同佢講。





「珍……妮……知道。」佢答我。

而我就搵左個位坐低，望住蔡老闆去一個好似呢度老闆嘅人面前，講左幾句有講有笑後就坐低左，睇佢地傾談嘅表情應該無咩問題，大嘅十五分鐘後，蔡老闆同呢位老闆握手後，佢就好開心咁行左過嚟。

「請左？」我問佢。

而佢就好興奮咁同我講：「係啊，請左拿，原來係因為呢度洗開碗嘅阿姐大陸個仔結婚買左樓，要返去住所以下個星期就唔做，呢度做幾好添啊，就包三餐添。」

「咁以後飯錢都慳返ＷＯ。」我笑住話。





「係啊，呢次真係多謝你啊。」蔡老闆好感激話。

「唔駛多謝我，要多謝嘅，就多謝我果位朋友啦。」我話。

「係嘅係嘅，咁你幫我約佢啊，我想請佢食飯多謝啊。」佢同我講，而我就笑左笑答佢：「等你做完第一個月，拎左人工後我就幫你約佢啦。」

「好啊。」佢笑到見牙唔見眼咁話，然後望一望呢度嘅餐牌話：「你都幫左我好多，咁不如我請你食呢度嘅叉燒飯啦，我知道你最鐘意食叉燒飯。」

見到佢咁盛意拳拳，我都唔好意思拒絕佢，「好啦。」

望到眼前嘅蔡老闆知道有工返就可以開心成咁，諗返自己個仔……一種好矛盾嘅心情。